3 снежня з нагоды Дня інвалідаў Рэспублікі Беларусь у філіяле «Карэліцкі маладзёжны цэнтр культуры» адбылася ўрачыстасць «Мы дорым вам цяпло сваёй душы». Яе ўдзельнікамі сталі члены раённых арганізацый грамадскіх аб’яднанняў: Беларускага таварыства інвалідаў, Беларускага таварыства інвалідаў па зроку, Беларускага таварыства глухіх і наведвальнікі аддзялення сацыяльнай рэабілітацыі, абілітацыі Цэнтра сацыяльнага абслугоўвання насельніцтва Карэліцкага раёна.
У сваёй прамове намеснік старшыні Карэліцкага раённага выканаўчага камітэта Яўген Чычкан назваў гэту ўрачыстасць прыемнай падставай збірацца ўсім разам, таму што для людзей з інваліднасцю ствараюцца ўсе ўмовы для жыцця і правядзення вольнага часу. Адзначыў іх творчыя здольнасці і пажадаў усім міру, здароўя, натхнення і новых дасягненняў!
Начальнік упраўлення па працы, занятасці і сацыяльнай абароне Карэліцкага райвыканкама Іна Богуш, адрасоўваючы людзям з інваліднасцю шчырыя і цёплыя словы, адзначыла клопат і падтрымку дзяржавы: пенсіі, дапамогі, тэхнічныя сродкі рэабілітацыі, даплаты, ільготы. «У краіне аказваецца ўсебаковая дапамога людзям з абмежаванымі магчымасцямі, а вы ў сваю чаргу творыце, спяваеце, танцуеце — вы імкніцеся быць на роўных з працуючымі», — адзначыла прамоўца.
Іна Аляксандраўна ўручыла Падзякі за актыўны ўдзел наведвальнікам ЦСАН Карэліцкага раёна: Руслану Ганчарову, Андрэю Піцюлю, Ірыне Моніч, Крысціне Радзецкай, Анастасіі Азаданавай, Іне Клаўсуць. «Новых творчых дасягненняў і добрага здароўя! Калі ваша душа адкрытая — і да вас з адкрытай душой», — сказала прамоўца.
Благачынны Карэліцкай акругі іерэй Ігар Пірог нагадаў пра евангельскія выпадкі, калі Гасподзь дапамагае ў розных мерапрыемствах, таму і святары раёна імкнуцца прымаць удзел у рознага роду акцыях, сустрэчах, урачыстасцях. «Я шмат разоў быў у Цэнтры і бачыў працы людзей з інваліднасцю і кожны раз задаваў сабе пытанне: хто бліжэй да Бога?» — адзначыў святар і пажадаў прысутным далейшых творчых поспехаў.
Ігар Пірог уручыў Іне Богуш ікону Святой Багародзіцы для ЦСАН Карэліцкага раёна.
На ўрачыстасці была прадстаўлена канцэртная праграма. У выкананні Руслана Ганчарова і Ірыны Бондаравай прагучала песня «Стары клён», якая выклікала гучныя апладысменты ў гледачоў. Сваё майстэрства падарылі ўдзельнікі народнага ансамбля песні «Забава» Карэліцкага раённага Цэнтра культуры і народнай творчасці.
СЛОВА — УДЗЕЛЬНІКАМ УРАЧЫСТАСЦІ:
Руслан ГАНЧАРОЎ, наведвальнік Цэнтра сацыяльнага абслугоўвання насельніцтва Карэліцкага раёна:
— Я наведваю Цэнтр і авалодваю камп’ютарнай граматай, і гэта мне даспадобы. А яшчэ люблю спяваць добрыя песні, і сёння выканаў адну з іх — «Стары клён». Для мяне песня — гэта радасць, якую нясу слухачам. Наведвальнікам ЦСАН Карэліцкага раёна зычу здароўя, шчасця, поспехаў, а кіраўніцтву выказваю словы падзякі за разуменне, падтрымку і дапамогу. Няхай усё і ва ўсіх заўсёды ладзіцца.
Аксана ХВАСЬКО, наведвальніца Цэнтра сацыяльнага абслугоўвання насельніцтва Карэліцкага раёна:
— З 28 па 30 лістапада я прымала ўдзел ў ІІ Рэспубліканскай выставе-кірмашы, дзе паказвала майстар-клас па вырабе ёлачных цацак і атрымла Падзяку Міністэрства працы і сацыяльнай абароны. А 5 снежня паедзем выступаць у г. Смаргонь, дзе будзем прадстаўляць песню «Стары клён». Сёння вельмі добры дзень, і прыемна, што для нас наладзілі гэтую ўрачыстасць, на душы цёпла і хораша. Няхай так будзе заўжды!
Людміла УРБАНЧУК, спецыяліст па сацыяльнай рабоце ЦСАН Карэліцкага раёна:
— Я праводжу майстар-клас па роспісу імбірных пернікаў. Стаўлю перад сабой мэту: зрабіць прыгожае і смачнае разам. Гэта можна рабіць аднаму, з сябрамі, з сям’ёй. Імбірныя пернікі — добрая падстава правесці час разам. Сёння ёсць шмат жадаючых паспрабаваць сябе ў гэтым мастацтве. Прыемна, што гэта радуе дарослых і дзяцей.
Лілія КУДЗІНА, кіраўнік гуртка «Умелыя ручкі» аддзялення рэабілітацыі, абілітацыі ЦСАН Карэліцкага раёна:
— У гуртку мы ствараем вырабы ручной работы, заліваем гіпсавыя фігуркі і статуэткі, а таксама вырабляем араматызаваныя свечкі і мыла. Да Новага года рабілі ўпрыгажэнні для ёлкі, шарыкі з тканіны. Гэта патрабуе асаблівага майстэрства, творчага падыходу, уважлівасці, уседлівасці, развіваве памяць і дробную маторыку. У людзей з інваліднасцю гэта атрымліваецца, яны прыкладаюць максімум старанняў, і вырабы радуюць вочы. Мы прымаем удзел у выставах-продажах, і нашы вырабы купляюць з вялікім задавальненнем.
Галіна СМАЛЯНКА
Фота Кацярыны ЖАМОЙДЫ
