Карэліцкі раён па выніках першага квартала бягучага года сярод іншых раёнаў Гродзенскай вобласці займае чацвёртае месца па валавой вытворчасці сельскагаспадарчай прадукцыі. Пра гэта паведаміў старшыня Карэліцкага райвыканкама Генадзій Шатуеў.
— Гэта стала магчыма дзякуючы некалькім складнікам, — адзначае кіраўнік раёна. — Так, атрымана 22,5 тыс. т малака, або 107,9%. Ад адной каровы надоена 1726 кг малака (+122 кг). Для параўнання сярэднеабласны паказчык роўны 1692 кг (+102 кг).
Вытворчасць ялавічыны склала 1,8 тыс. т, або 107,3%. Сярэднеабласны паказчык — 105,1%. Сярэднясутачныя прывагі буйной рагатай жывёлы атрыманы ў памеры 753 г (+34 г). Пры гэтым сярэднеабласны паказчык складае 713 г (+23 г).
Добра спрацавалі спецыялісты ў галіне свінагадоўлі. Атрымана 2635 т, або 113,8%. Пры гэтым 40% удзельнай вагі ў вытворчасці свініны прыпадае на ЗАТ «Біямакс». Сярэднеабласныя паказчыкі роўныя 26741 т, або 103,5%. Раённыя сярэднясутачныя прывагі склалі 690 г (+11 г), сярэднеабласныя — 679 г (+23 г).
Генадзій Шатуеў занепакоены зніжэннем пагалоўя дойнага статку ў некаторых гаспадарках раёна. На сёння налічваецца 37820 галоў буйной рагатай жывёлы, з якіх 12951 дойная карова.

— Колькасць малочных кароў за першы квартал знізілася на 76 галоў, а гэта недапушчальна, бо мы будуем фермы і плануем павялічваць вытворчасць, — адзначае ён. — Па асемяненні цёлак і кароў мы таксама саступаем некаторым раёнам вобласці. Пад ацёл бягучага года ў нас асемянёна 5808 цёлак, тады як, напрыклад, у суседнім Навагрудскім раёне — 7473, Мастоўскім — 6536. Для павелічэння асемянення пагалоўя трэба зніжаць падзеж і павялічваць пагалоўе, тады і вытворчасць пойдзе ў рост. Немалаважна таксама і будаўніцтва новых жывёлагадоўчых аб’ектаў. У раёне такім будаўніцтвам займаюцца толькі чатыры прадпрыемствы: СВК «Маяк-Заполле», «Свіцязянка-2003», «Жухавічы» і КСУП «Лукі-Агра».
Не за гарамі сезон нарыхтоўкі кармоў, і старшыня райвыканкама адзначае:
— Самае важнае — захаванне тэхналагічных рэгламентаў. Неабходна выбраць аптымальны час для касьбы, не чакаць, пакуль трава перарасце. Трэба ўлічваць многае: вышыню зрэзу, ступень здрабнення, правяліванне масы, трамбоўку і герметычнае ўкрыццё. Лепш атрымаць кармоў менш, але высокай якасці. Таму ўсё залежыць ад працы механізатара, які сядзіць за рулём сельгасагрэгата.

Іна ЛЕЙКА







