Кожны трэці чацвер у краіне падчас адзінага дня інфармавання прадстаўнікі ўлады розных ўзроўняў сустракаюцца з насельніцтвам. Такая работа праводзіцца і ў Карэліцкім раёне. Карысць ад такіх сустрэч відавочная: людзі ў ходзе жывога дыялогу з кіраўніцтвам могуць спытаць аб тым, што хвалюе, папрасіць дапамогі.
18 ліпеня намеснік старшыні Карэліцкага райвыканкама Руслан Абрамчык сустрэўся з працоўным калектывам ДП “Птушкафабрыка “Чырвонаармейская”. Размова датычылася вытворчага траўматызму, захворванняў і праходжання медыцынскіх аглядаў.
— На жаль, кожны год у Карэліцкім раёне паміраюць людзі працаздольнага ўзросту, — адзначыў Руслан Абрамчык. — Ёсць выпадкі, калі вадзіцель памірае прама ў кабіне аўтамабіля з-за вострай сардэчнай недастатковасці або па гэтай жа прычыне на будаўнічым аб’екце абрываецца яшчэ адно жыццё. Не так даўно работнік памёр у час абкашвання тэрыторыі. Часта мы гаворым пра тэхніку бяспекі, калі важна ў час надзець каску або прышпіліць рэмень. А вось пра тыя фактары, якія прыводзяць да раптоўнай смерці, гавораць мала. Што ж прыводзіць да трагедыі? У першую чагу, ігнараванне медыцынскіх аглядаў, якія кожны працуючы павінен праходзіць раз на год. Зрабіць кардыяграму, здаць аналізы, памераць артэрыяльны ціск нескладана, але гэтыя простыя маніпуляцыі могуць выратаваць ад прагрэсіравання хваробы. І гэта ў першую чаргу адказнасць кіраўніцтва арганізацый і прадпрыемстваў, якія павінны трымаць гэтае пытанне на кантролі.
Галоўнае — знайсці час і прыйсці ў паліклініку. Здароўе чалавека — самае каштоўнае, бо за кожным работнікам — яго сям’я, падагульніў намеснік старшыні.
Інспектары па ахове працы канстатуюць: выяўленыя парушэнні на вытворчасці не заўсёды ўпіраюцца ў вялікія фінансавыя сродкі. Часцей за ўсё назіраецца абыякавасць людзей да сваіх прафесійных абавязкаў і спадзяванне на славуты “авось”: захламленасць працоўных месцаў, неагароджванне перападаў высот, драўляныя падстаўкі пад буйнагабарытную тэхніку. Гэта тое, што кожны год прыводзіць да траўмаў. Напрыклад, некалькі гадоў таму на адным з сельгаспрадпрыемстваў раёна пры падзенні металічнага каўша з драўляных козлаў працаўнік атрымаў цяжкую траўму нагі. У мінулым годзе жанчына засталася без кісці, калі працавала на абсталяванні без ахоўнай крышкі.
Спыніўся Руслан Абрамчык і на выніках нядаўна прайшоўшых II Еўрапейскіх гульняў у Мінску.
—Турысты пачынаюць адкрываць для сябе Беларусь, — адзначыў ён. — Беларусы заявілі пра тое, што такое Беларусь, прадэманстравалі сваю нацыянальную самабытнасць. Рэспубліка атрымала рэпутацыю краіны, якая гатова праводзіць буйныя спартыўныя спаборніцтвы. За шэсць месяцаў бягучага года Гродзенскую вобласць па бязвізавым рэжыме наведала ўдвая больш турыстаў, чым за ўвесь мінулы год. Карэліцкі раён таксама далучыўся да правядзення II Еўрапейскіх гульняў. Пасёлак Мір сустракаў эстафету Алімпійскага агню “Полымя свету”. Больш за 300 карэліччан толькі па лініі арганізацый і прадпрыемстваў наведалі Еўрагульні.
У ходзе размовы работнікі птушкафабрыкі “Чырвонаармейская” пацікавіліся, калі будзе добраўпарадкаваны міні-палігон для цвёрдых бытавых адходаў у аграгарадку Аюцавічы. Дырэктар Карэліцкага жылкамунгаса Аляксандр Рудак адказаў, што ў бягучым годзе гэты палігон будзе зачынены. Увогуле з 54 міні-палігонаў у раёне застанецца ўсяго 14. Гэта дазволіць рашыць праблему ўпарадкавання і ўтылізацыі смецця, а таксама палепшыць экалагічную абстаноўку ў раёне.
Начальнік Карэліцкага раённага аддзела па надзвычайных сітуацыях Дзяніс Стадольнік звярнуў увагу на частыя выпадкі загарання халадзільнікаў, з-за якіх церпяць дамы і кватэры. “Калі вашаму халадзільніку больш за 10-15 гадоў, лепш замяніць яго, каб не адбылося вогненнае здарэнне”, — падкрэсліў кіраўнік выратавальнага ведамства.
Іна ЛЕЙКА
Фота аўтара
