Традыцыйна па ініцыятыве раённай арганізацыі прафсаюза работнікаў АПК на Карэліччыне праводзяцца працоўныя спаборніцтвы на розных відах сельскагаспадарчых работ, у тым ліку падчас корманарыхтоўчай кампаніі. Не так даўно фінішаваў першы ўкос траў, які вызначыў сваіх герояў. Механізатары, якія найлепш спрацавалі на зялёным жніве, атрымалі прафсаюзныя ўзнагароды – Падзячнае пісьмо і грашовы сертыфікат.
У панядзелак, 6 ліпеня, павіншаваць тых працаўнікоў Карэліччыны, якія ўносяць неацэнны ўклад у стварэнне трывалай кармавой базы для грамадскага статку на прадстаячы зімовы перыяд, накіравалася старшыня райкама прафсаюза работнікаў АПК Ірына Пянькоўская. Зразумела, у напружаныя дні корманарыхтоўчай кампаніі з перадавікамі зялёнага жніва можна сустрэцца толькі на сенажацях раёна. Вось і трактарыст-машыніст КСУП “Царука” Генадзій Васілеўскі, які на трактары МТЗ-82 з прычапным агрэгатам KRONE па выніках першага ўкосу траў скасіў 723 га, атрымаў узнагароду непасрэдна на працоўным месцы – на палетках сельгаспрадпрыемства.
– Падвёўшы вынікі першага ўкосу траў на 25 чэрвеня бягучага года, райкам прафсаюза работнікаў АПК вызначыў пераможцаў. Вы – адзін з тых, хто спрацаваў найлепш і выканаў найбольшы аб’ём працы, – звярнулася да механізатара Ірына Пянькоўская. – Прыміце шчырыя словы падзякі за працу і пажаданне здароўя і новых працоўных дасягненняў.
Дарэчы, Генадзій Васілеўскі штогод у перадавіках раёна, а стаж працы аграрыя ў гаспадарцы перавышае 30 гадоў.
– Пасля арміі некаторы час працаваў у Мінску, на заводзе жалезабетонных канструкцый, – дзеліцца мужчына. – Але вярнуўся на малую радзіму, прыйшоў на працу ў мясцовую гаспадарку. Тут і застаўся. Усё лета на касьбе заняты, вясной і восенню – на ўнясенні арганікі. Касіць вельмі люблю. Калі добры сенакос, за працоўны дзень магу 30-35 га скасіць. На сённяшні дзень мой рэкорд – 36 га. А як прыемна з самага ранку выйсці ў поле і пакасіць звычайнай ручной касой. Адно задавальненне!
У гэты дзень яшчэ адна заслужаная ўзнагарода ад прафсаюзаў раёна знайшла свайго ўладальніка. Найлепшы вынік на прасаванні траў першага ўкосу паказаў трактарыст-машыніст КУСП “Чарняхоўскі- Агра” Мікалай Грэмяка, які на трактары МТЗ-1221 у звязцы з агрэгатам FBP-2135 выканаў працу на 1313 га.
– У гаспадарку прыйшоў у 1992 годзе. Летам на прэсе працую, у стрэйч-плёнку сянаж пакую, сена – у катушкі, на жніве салому цюкую, – расказвае аграрый. – Зразумела, часам паломкі здараюцца. У такіх выпадках імкнешся адрамантаваць тэхніку як мага хутчэй. Не хочацца падводзіць кіраўніцтва гаспадаркі, ды і заробак страчваць.
На зграбанні траў першага ўкосу лепшым прызнаны трактарыст-машыніст КСУП “Малюшычы” Аляксандр Саладуха. На трактары МТЗ-82 у звязцы з прычапным агрэгатам Tonutti механізатар выканаў працу на 1091 га.
– З 1980 года, адразу ж пасля заканчэння 10 класаў Малюшыцкай сярэдняй школы, маім нязменным месцам працы з’яўляецца сучаснае КСУП “Малюшычы”. А гэта ні многа ні мала – 40 гадоў, – дзеліцца механізатар гаспадаркі. – За гэтыя дзесяцігоддзі давялося папрацаваць на ўсіх відах сельгасработ, рознай тэхніцы. Адзінае магу сказаць дакладна: тэхніка любіць клопат. Добра яе падрыхтуеш, тады і яна табе аддзячыць бесперабойнай работай.
Аксана ЯНУШ
Фота аўтара
