24 жніўня ў аграгарадку Малюшычы падчас правядзення свята “Спасаўка-ласаўка” віталі ўдзельнікаў жніва-2024. Мерапрыемства выдалася вясёлым, маляўнічым і вельмі смачным.
Праз тэатралізаваны зварот-прадстаўленне работнікі Малюшыцкага Дома культуры расказалі пра традыцыі святкавання праваслаўнага свята Спаса.
Далей галоўнымі героямі ўрачыстасці сталі камбайнеры, вадзіцелі, аператары зернесушыльных комплексаў, дыспетчары ДП “Малюшычы”, інжынерная служба і ўсе тыя, хто ў гарачую пару працаваў для агульнай справы, каб на стале быў хлеб.
Хлеб здаўна лічыўся сімвалам жыцця, урадлівасці і дабрабыту простага народа. Па добрай традыцыі караваі новага ўраджаю ўручылі дырэктару сельгаспрадпрыемства Крысцінэ Шчара, галоўнаму аграному Сяргею Шышу і гасцям свята: старшыні райкама прафсаюза работнікаў АПК Ірыне Пянькоўскай і старшыні Малюшыцкага сельскага Савета Віктару Дзірвуку.
— Сёння мы сабраліся тут, каб павіншаваць нашых працаўнікоў, якія любяць зямлю, працуюць на ёй, гадуюць хлеб і клапоцяцца, каб ён заўсёды быў на нашым стале, — звярнулася да прысутных дырэктар Крысцінэ Іванаўна. — Жніво ніколі не бывае простым. За ім цяжкая руплівая праца хлебаробаў. Сёння ўсе разам мы шануем тую каласальную працу, якая пачынаецца ад пасеву збожжа і завяршаецца выдатнымі творамі мастацтва, якія мы бачым на стале. Сёлетні каравай ДП “Малюшычы” склаў 9063 тоны 345 кг пры сярэдняй ураджайнасці 47 ц/га. У нас у засеках 1890 тоны рапсу пры сярэдняй ураджайнасці 47,3 ц/га. Я хачу падзякаваць усім удельнікам уборачнай кампаніі-2024, арганізатарам мерапрыемства і пажадаць усім, каб іх сталы былі поўныя пачастункаў, а ў доме панавалі ўтульнасць і любоў.
Падзякавала аграрыям за прафесійную працу, за тое, што кожны на сваім месцы зрабіў усё, каб сабраць ураджай якасна і своечасова, Ірына Пянькоўская. Свае віншаванні віноўнікам урачастасці адрасавалі старшыня сельвыканкама Віктар Дзірвук і галоўны аграном гаспадаркі Сяргей Шыш.
Яшчэ адна добрая традыцыя свята хлеба — ушанаванне тых, хто дасягнуў высокіх вынікаў на вытворчасці. Падзячныя пісьмы сельгаспрадпрыемства атрымалі камбайнеры Аляксандр Гіз, Юрый Напорка, Сцяпан Барыскін, Сяргей Альшэўскі і ўсе экіпажы, якія працавалі на ўборцы ўраджаю.
Падзячныя пісьмы і шчырыя словы гучалі і ў адрас вадзіцеляў Алега Саладухі , Мікалая Маславіча, Мікалая Казака, Сяргея Дарафея, Аляксандра Цвірко, Вячаслава Шэгі, Дзмітрыя Ката, якія былі задзейнічаны па адвозцы збожжа і рапсу.
Не засталіся безуважнымі і спецыялісты інжынернай службы, работнікі зернесушыльнай гаспадаркі, трактарысты-машыністы.
Павіншавала аграрыяў старшыня пярвічнай прафсаюзнай арганізацыі ДП “Малюшычы” Ася Андрэйчык. Яна ўручыла ўзнагароды дырэктару гаспадаркі Крысцінэ Шчары, вагаўшчыку Валянціне Гурыновіч, кладаўшчыкам Алене Аляшкевіч і Надзеі Уткінай, дыспетчару Алене Дзірвук і намесніку дырэктара па ідэалагічнай рабоце Святлане Казак.
Падчас свята таксама была адзначана работа рабят студэнцкага атрада імя Я. Фогеля.
Хлебаробы сапраўды пастараліся: кожны ўносіў сваю пасільную лепту ў агульны намалот. Годная праца заслугоўвае самых высокіх пахвал.
У гэты дзень не абышлося без конкурсаў, віктарыны і песень у выкананні работнікаў культуры. А самыя маленькія гледачы з цікавасцю прынялі ўдзел у майстар-класе па развучванні народных танцаў.
Яркім упрыгожваннем свята былі кулінарныя вырабы мясцовых майстрых. А ўзнагароджанне ўдзельнікаў-кулінараў стала прыемным завяршэннем хлебнага свята.
Хлеб па вартасці заўсёды заслугоўвае свайго асобнага свята. Мяняюцца каштоўнасці, густы, але хлеб быў і застаецца самым неабходным прадуктам для кожнага з нас, ён — аснова жыцця і здароўя.
Жыхарка аграгарадка Малюшычы Ала Уласевіч лічыць:
— Выдатнае мерапрыемства. Хлеб здаўна быў сімвалам жыцця і дабрабыту. Ён быў усяму галава. Таму хлебам і соллю заўсёды сустракалі дарагіх гасцей. Ім бацькі благаслаўлялі сваіх дзяцей у час вяселля. Бохан хлеба заўсёды бралі з сабой у далёкую дарогу. Важна захоўваць беражлівыя адносіны да хлеба, перадаваць гэтую ісціну з пакалення ў пакаленне. Цудоўна і тое, што сёння нашы аграрыі адзначаюць адно з важнейшых свят хлебаробаў. Хвала рукам, што пахнуць хлебам!
Кацярына КУКАНАВА
Фота аўтара
