Урачыстая цырымонія адкрыцця трэцяга працоўнага семестра адбылася ў СВК “Свіцязянка-2003”. На сельскагаспадарчых аб’ектах на працягу месяца будуць працаваць 23 байцы — у асноўным гэта школьнікі, ёсць навучэнцы прафтэх і будучыя студэнты. Студатрад носіць ганаровае імя Героя Савецкага Саюза Уладзіміра Царука.
— Рух студэнцкіх атрадаў у краіне мае больш чым паўвекавую гісторыю, — адзначыла першы сакратар РК ГА «БРСМ» Аксіння Ждан. — Асаблівую ролю ў яго развіцці адыгрывае дзяржаўная падтрымка. Студатрад — гэта набыццё спецыяльнасці і магчымасць атрымаць свае першыя грошы. Гэта і школа патрыятызму, таварыства і сяброўства.
Да віншаванняў далучыўся і намеснік старшыні райвыканкама старшыня РА РГА «Белая Русь» Яўген Чычкан:
— Вы вырашылі паспрабаваць сябе ў вельмі няпростай, але ганаровай працы аграрыя. Менавіта работнікі сельскай гаспадаркі ад зары і да цямна шчыруюць, каб вырабляць прадукцыю не толькі для ўнутранага рынку, але і на экспарт.
Выконваючы абавязкі старшыні СВК «Свіцязянка-2003» Аляксандр Мяцеліца падкрэсліў, што ў атрад змаглі трапіць усе жадаючыя:
— У нас дастаткова аб’ектаў, каб забяспечыць рабят працай. Акрамя таго, яны дастаўляюцца да месца працы нашым транспартам, маюць магчымасць абедаць і вячэраць за сімвалічную плату. Усе забяспечаны спецадзеннем. Таму нядзіўна, што палова з іх — гэта тыя, хто ўжо працаваў у нас раней. Прыйшлі не толькі мясцовыя, але і гарадскія, з Мінска, Ліды, Баранавіч.
Дзевяцікласнік адной са школ г. Баранавічы Данііл Машчонскі расказвае, што прыехаў да бабулі пагасцяваць. Сябры расказалі аб магчымасці зарабіць. Юнак неадкладна пайшоў запісвацца ў атрад:
— Праца не складаная, а заробак абяцаюць нядрэнны. Куплю сабе што-небудзь да 1 верасня.
Камандзір атрада Дар’я Філіпава ўжо некалькі гадоў працуе настаўнікам, але летам прыязджае да бацькоў у Райцу і таксама спяшаецца далучыцца да будатрадаўскай руху.
Жыхар Райцы Міхаіл Купраш з 1 верасня стане студэнтам БАТУ, будзе асвойваць прамудрасці прафесіі інжынера-механіка. Пакуль жа таксама пайшоў у атрад, каб не сумаваць дома:
— Я ўзяў мэтавае накіраванне ад СВК «Свіцязянка-2003», таму па-ступіў без экзаменаў. Буду атрымліваць ад гаспадаркі дадатковую стыпендыю. З задавальненнем вярнуся працаваць у родную вёску.
Трэці год у ліку студатрадаўцаў працуе і навучэнец Карэліцкага прафтэхліцэя, будучы кранаўшчык Уладзіслаў Крывіцкі:
— У нас тут дружная кампанія, за працай не сумуем, любім пажартаваць. Усім рабятам раю не сядзець дома, а ісці ў такія атрады.
Іна ЛЕЙКА
Фота аўтара
