Сцэнарый гэтага лета маладзёжны экіпаж з СВК “Свіцязянка-2003” у складзе Дзмітрыя Урбановіча і Яўгенія Мяцеліцы напісалі яшчэ вясной, калі вырашылі, што падчас уборачнай кампаніі будуць працаваць разам. Як паказваюць вынікі, яны не прагадалі. Юнакам удалося ў ходзе ўборачнай страды на камбайне айчыннай вытворчасці КЗС-1624 перасягнуць дзвюхтысячны рубеж.
Ураджай у сельгаспрадпрыемства багаты, таму яно ўваходзіць у чацвёрку лепшых гаспадарак Карэліччыны па ўраджайнасці збожжавых.
У страду-2024 маладзёжнаму экіпажу Дзмітрыя Урбановіча і яго памочніку Яўгенію Мяцеліцы на КЗС-1624 першым скарыўся тысячны рубеж. Але ніякага сакрэту, па словах маладых людзей, тут няма – трэба проста ведаць і адказна выконваць сваю працу.
– Уборка выйшла на фінішную прамую. На гэты момант намалацілі ўжо 2130 тон, – распавёў Дзмітрый. – Да другой тысячы тон прыйшлі не заўважна. Ураджай выдатны. Тэхніка не падводзіць. Зараз мы жнём грачыху. Завершым жніво з яшчэ большым вынікам. Для мяне гэта першая ўборачная ў якасці камбайнера, таму вынікі, безумоўна, радуюць.
Малады механізатар родам з Навагрудчыны, у гаспадарцы працуе ўжо пяць гадоў. Да жніва даглядаў пасевы, уносіў хімію, а зараз пажынае плады сваёй працы. У новай для яго справе адчувае сябе ўпэўнена.
Яго памочнік Яўгеній нарадзіўся і вырас на райцаўскай зямлі. Два гады таму вярнуўся ў родную гаспадарку і працуе інжынерам.
– Для мяне гэта не першая ўборачная, я ўжо некалькі гадоў запар працую памочнікам камбайнера. Ці цяжкая праца? Ведаеце, у вёсцы іншай няма. Але мы, вяскоўцы, прывучаны з дзяцінства: калі хочаш добра жыць, трэба працаваць. Уборачная, вядома, вельмі адказны перыяд, хоць я б не стаў недаацэньваць астатнія. Тое, што мы цяжка працуем летам, далёка не значыць, што ў астатні час прахалоджваемся. Толькі тут адразу бачыш вынік сваёй працы, – падзяліўся Яўгеній.
Да размовы з удзельнікамі жніва далучыўся галоўны аграном сельгаспрадпрыемства Дзмітрый Волк, які адзначыў, што ў гаспадарцы заўсёды перажываюць і падтрымліваюць моладзь і заахвочваюць за добрасумленную працу. Маладыя аграрыі павінны адчуваць, наколькі важна для краіны і людзей тое, што яны робяць. Бо менавіта яны паказваюць прыклад для ўсёй астатняй моладзі краіны, працуючы плячом да пляча са старэйшым пакаленнем і дэманструючы годныя вынікі.
Кацярына КУКАНАВА
Фота аўтара
