Аб развіцці фізічнай культуры і спорту ў Карэліцкім раёне за 2025 год і задачах на 2026 год паведаміў начальнік сектара спорту Карэліцкага раённага выканаўчага камітэта Аляксандр Галушка.
У раёне створаны ўмовы па забеспячэнні даступнасці насельніцтва да заняткаў фізічнай культурай і спортам, маецца пэўная матэрыяльна-тэхнічная база. Насельніцтву прадастаўлена 79 спартыўных збудаванняў: стадыён «Юнацтва» ў г.п. Карэлічы, 9 спартыўных залаў, 41 плоскаснае збудаванне, у тым ліку 30 спартыўных пляцовак, 11 футбольных палёў, 17 прыстасаваных памяшканняў і трэнажорных залаў, 4 стралковыя ціры.
На развіццё фізічнай культуры і спорту з раённага бюджэту выдзелена больш 1 млн рублёў. Дзяржаўны сацыяльны стандарт фінансавання расходаў фізічнай культуры і спорту на аднаго жыхара за 2025 год склаў 1,44 базавай велічыні.
У галіне фізічнай культуры і спорту працуе 35 штатных спецыялістаў, у тым ліку 22 спецыялісты ва ўстановах адукацыі, 7 трэнераў і кіраўнікоў ДУ «Дзіцяча-юнацкая спартыўная школа Карэліцкага раёна», 3 работнікі ДУ «Карэліцкі раённы фізкультурна-спартыўны клуб».
Фізічнай культурай і спортам у раёне займаецца 3991 чалавек, што складае 22,1% ад агульнай колькасці жыхароў раёна.
За 2025 год праведзена 71 фізкультурна-аздараўленчае і спартыўна-масавае мерапрыемства, у якіх прынялі ўдзел 3905 чалавек.
У здачы нарматываў Дзяржаўнага фізкультурна-аздараўленчага комплексу Рэспублікі Беларусь прыняло ўдзел 127 чалавек (98 дзяцей і 29 дарослых). 35 чалавек выканалі нарматыў, прадугледжаны Дзяржаўным фізкультурна-аздараўленчым комплексам.
Выкананы ўсе мэтавыя паказчыкі Дзяржаўнай праграмы «Фізічная культура і спорт» на 2021-2025 г.г.
У 2025 годзе была сфарміравана сетка спартыўна-аздараўленчых лагераў ДУ «ДЮСШ Карэліцкага раёна» і прыняты меры па максімальным прыцягненні спартсменаў-навучэнцыў. Для аздараўлення ў профільную 12-дзённую кругласутачную змену было задзейнічана 105 спартсменаў-навучэнцаў. Ахоп аздараўленнем склаў 47,7%.
Рознымі формамі фізкультурна-аздараўленчай работы ахоплена 69 чалавек. Для дарослых працуюць секцыі валейбола, для дзяцей і падлеткаў у летні перыяд — футбол. У адпаведнасці з каляндарным планам спартыўна-масавых мерапрыемстваў праводзяцца спаборніцтвы ў праграме спартакіяды сярод калектываў фізкультуры сельскагаспадарчых арганізацый, прапрыемстваў, арганізацый і ўстаноў г.п. Карэлічы і г.п. Мір.
У спартакіядзе і аглядзе-конкурсе сярод калектываў фізкультуры сельскагаспадарчых арганізацый са станоўчага боку адзначаны КСУП «Лукі-Агра», КУСП «Чарняхоўскі-Агра», СВК «Маяк-Заполле», «Свіцязянка-2003», «Жухавічы», сярод калектываў г.п. Карэлічы: ААТ «Карэлічы-Лён», Карэліцкі раён электрычных сетак, Карэліцкі сырцэх «Навагрудскія дары» філіяла ААТ «Лідскі малочна-кансервавы камбінат», УАЗ «Карэліцкая ЦРБ».
Вызначаны асноўныя задачы на 2026 год у галіне спорту. Гэта рэалізацыя мерапрыемстваў Дзяржаўнай праграмы «Фізічная культура і спорт» на 2026-2030 г. г.; забеспячэнне падрыхтоўкі і якаснага ўдзелу спартсменаў у абласных і рэспубліканскіх спаборніцтвах; прафарыентацыйная работа з навучэнцамі на трэнерскія спецыяльнасці на ўмовах мэтавай падрыхтоўкі; папулярызацыя дзейнасці спорту праз сацыяльныя сеткі і інтэрнэт-рэсурсы; павышэнне ўзроўню ідэалагічнай работы, працоўнай і выканаўчай дысцыпліны ў падведамасных арганізацыях; забеспячэнне эфектыўнага кантролю за правядзеннем заняткаў падчас арганізацыі вучэбна-трэніровачнага працэсу, спартыўных мерапрыемстваў і прафілактыка спартыўнага траўматызму.
Аляксандр Галушка падзякаваў усім прысутным за актыўную спартыўную работу, доўга заставацца ў спартыўным страі і надалей добрасумленна працаваць на дасягненне агульных вынікаў.
У правядзенні нарады прыняў удзел намеснік старшыні раённага выканаўчага камітэта Яўген Чычкан і ўручыў ўзнагароды лепшым спартсменам раёна.
— Мы заўсёды рады вашым перамогам у спорце, і няхай імкненне і жаданне перамагаць не пакідае. Поспехаў вам у новых пачынаннях і перамогі над самім сабой, — адзначыў Яўген Чычкан.
Галіна СМАЛЯНКА
Фота Андрэя ДЗЯНІСКА
