Ксенія Мацэль, выпускніца сярэдняй школы г. п. Мір, не зрабіла ніводнай памылкі на цэнтралізаваным тэсціраванні па беларускай мове. Усе 30 заданняў з часткі «А» і 10 з «В» выканала правільна. На сёння ўжо вядома, што ўраджэнка нашага раёна стала адной з шасці абітурыентаў Гродзенскай вобласці, дасягнуўшых у 2016 годзе найвышэйшага выніка на ЦТ па гэтым прадмеце. Журналіст рэдакцыі газеты «Полымя» пацікавілася, студэнткай якой вну стала дзяўчына і ў чым сакрэт яе поспеху.
– Ксенія, як ты рыхтавалася да цэнтралізаванага тэсціравання па навучальных прадметах?
–Адразу пасля летніх канікул перад выпускным класам пачала ўзмоцнена грызці граніт ведаў і займалася рэгулярна. Акрамя беларускай мовы, падцягвала матэматыку і англійскую мову.
Каб дасягнуць жаданага выніку, упэўнена, патрэбна пастаянная практыка. Шмат у чым мне дапамагала выкладчык беларускай мовы і літаратуры Алена Аліеўна Смольская. Я ёй вельмі ўдзячная за нашу супольную працу, разуменне, цярплівасць, асабліва – за дадатковыя заданні. Выдатна, што яны былі менавіта на тыя правілы, без валодання якімі паспяхова здаць ЦТ складана.
– У дзень ЦТ, якое прынесла табе стобальны сертыфікат, хвалявалася? Што дапамагло набрацца смеласці?
– ЦТ па беларускай мове стала для мяне першым выпрабаваннем. І самае дзіўнае, што ў гэтую раніцу я трывожылася менш усяго. Добра помню, як спакойна села за стол і пачала выконваць заданні, не думаючы ні аб чым іншым. Упэўненасці надавала тое, што мае родныя верылі ў мяне. Ды і я проста не магла не апраўдаць іх чаканняў.
– Што ты адчула, калі даведалася пра такую вялікую перамогу?
– Я не паверыла вачам. Праўду кажучы, адразу прамільгнула думка: гэта нейкая памылка. Некалькі разоў пераправярала вынікі, а потым з’явілася прыемная дрыжанне ў руках, слёзы. Вядома, у такія моманты разумееш, што твая праца і старанні не прайшлі дарма. Я надта шчаслівы чалавек, бо магу падзяліць гэтую радасць з бацькамі і сябрамі.
– У якую вну паступіла? І чаму?
– Я падала дакументы ў Акадэмію кіравання пры Прэзідэнце Рэспублікі Беларусь. З верасня буду вучыцца на факультэце інавацыйнай падрыхтоўкі. На маё рашэнне паўплываў не столькі прэстыж гэтай вну, колькі добрыя водгукі яе студэнтаў. Выбірала прафесію сама, будую планы на будучыню.
– А чым захаплялася падчас вучобы ў школе?
– Цяжка паверыць, што школьныя гады прайшлі. Шматлікія конкурсы, яркія мерапрыемствы і займальныя спаборніцтвы зрабілі іх проста незабыўнымі. Я была капітанам каманды КВЗ сярэдняй школы г. п. Мір, удзельнікам агітбрыгады. Мяне захаплялі навуковыя канферэнцыі, прадметныя алімпіяды па гісторыі і рускай мове. Але больш за ўсё ганаруся тым, што з’яўляюся ўладальнікам двух дыпломаў першай і другой ступеняў рэспубліканскага конкурсу юных экскурсаводаў «Мая малая Радзіма», які праводзіўся ў рамках усебеларускай акцыі «Жыву ў Беларусі, тым ганаруся». У вольны час займаюся спортам і танцамі. Зараз увахожу ў танцавальны калектыў, для мяне танец – спосаб перадачы пачуццяў і настрою душы.
– Што б ты параіла будучым выпускнікам 2017 года?
– Падыходзьце да выбару прафесіі сур’ёзна. У першую чаргу думайце пра ўласныя жаданні. Верце ў сябе. Дакладна ведаю, што нават самыя запаветныя мары спраўджваюцца. Поспехаў!
Гутарыла Антаніна ХАТЭНКА,
студэнтка 3 курса
Інстытута журналістыкі БДУ.
