Два тыдні засталося да дня, калі званок пакліча вучняў за парты. Установы адукацыі раёна наведалі дзве прыёмныя камісіі, праведзена нарада па падрыхтоўцы ўстаноў адукацыі да новага навучальнага года.
З душой, як для сваіх
Разам з членамі камісіі накіроўваюся ў дарогу. Мае чаканні апраўдаліся: у Палужскім дзіцячым садку тэрыторыя парадавала яркімі фарбамі. Увагу прыцягнула альтанка з беларускім арнаментам, у садку — куток «Гісторыя маёй маленькай радзімы — Палужжа». У групавых пакоях чыста і ўтульна, тут зроблены рамонт гаспадарчым спосабам.
Праведзены рамонтныя работы і ў СПЦ Карэліцкага раёна. У актавай зале, як у святліцы. «Аб’ект прыняты!» — выносяць рашэнне правяраючыя дзвюм установам адукацыі аграгарадка Палужжа, якія месцяцца ў адным будынку.
Дашкольную ўстанову ў Малюшычах будуць наведваць 19 дзяцей. Тут ім вельмі рады: усё зрабілі з душой, як для сваіх, сваімі рукамі. Пафарбавалі сцены будынка, зрабілі адмостку. На тэрыторыі садка ў вочы кінулася рукавічка-церамок — без казкі аніяк. У памяшканні — беларускі куточак: тут каласкі жыта, кнігі, газеты, сувеніры. Дзіцячы садок атрымлівае сертыфікат гатоўнасці да новага навучальнага года.
Гавораць, што гаспадар пазнаецца па двары. Прышкольная тэрыторыя ў ДУА «Райцаўскі ВПК дзіцячы сад — сярэдняя школа» вялікая і дагледжаная. Ды сама навучальная ўстанова і спартыўная база таксама дастойныя. У новым навучальным годзе ўстанову адукацыі будуць наведваць 109 вучняў і 29 дашкольнікаў, якім тут будзе камфортна.
Сваёй адметнасцю вызначаецца ДУА «Цырынскі дзіцячы сад — сярэдняя школа». Наведваючы адзін за адным утульныя класы, у кабінеце гісторыі ўвагу прыцягнула экспазіцыя «Жыві і памятай». Больш таго, у школе аформлена тэматычная экспазіцыя музея з гісторыі ўстановы адукацыі «Гадоў імклівы бег — багацце нашай школы». Змешчаны фота настаўнікаў і выпускнікоў розных гадоў. На «Дрэве сённяшняга дня» — здымкі найбольш яркіх масавых падзей. Як высветлілася, школа гатова прыняць вучняў, а настаўнікі даваць ім трывалыя веды і выхоўваць сапраўдных патрыётаў краіны.
Падчас наведвання навучальных устаноў члены камісіі дэталёва і старанна вывучалі пытанні гатоўнасці іх да новага навучальнага года. У склад камісіі ўваходзілі работнікі ўпраўлення адукацыі райвыканкама, прадстаўнікі райэпідэмстанцыі, раённага аддзела па надзвычайных сітуацыях — усе зацікаўленыя ў тым, каб для дзяўчынак і хлопчыкаў былі створаны неабходныя ўмовы для вучобы ў навучальных установах раёна.
Задача — адна на ўсіх
У ДУА «Сярэдняя школа № 1 г. п. Карэлічы» адбылася нарада па выніках праверкі гатоўнасці ўстаноў адукацыі да новага навучальнага года. З інфармацыяй выступілі начальнік упраўлення адукацыі Карэліцкага раённага выканаўчага камітэта Ірына Асташэвіч і яе намеснік Ала Шэўка.
Прыёмка ўстаноў адукацыі раёна да пачатку новага навучальнага года праведзена 11 і 12 жніўня міжведамаснымі групамі. У іх склад былі ўключаны прадстаўнікі кантрольных і наглядных службаў. Дзве рабочыя камісіі наведалі 21 установу адукацыі. У ходзе работы камісіі звярталі ўвагу на добраўпарадкаванне прылягаючай і замацаванай тэрыторыі, эстэтыку афармлення вучэбных кабінетаў, групавых, стан інфармацыйных стэндаў, дзяржаўнай сімволікі Рэспублікі Беларусь. Падчас сваіх справаздач кіраўнікі рабочых камісій расказалі прысутным аб гатоўнасці навучальных устаноў да новага навучальнага года.
«Аб гатоўнасці харчовых блокаў да новага навучальнага года. Захаванне патрабаванняў СанПіН пры арганізацыі адукацыйнага працэсу» — тэма выступлення намесніка галоўнага санітарнага ўрача ДУ «Карэліцкі раённы цэнтр гігіены і эпідэміялогіі» Валянціны Бузюк. Эпідэміёлаг адзначыла, што ў цэлым работа праведзена значная, усе пытанні своечасова вырашаны.
Начальнік Карэліцкага раённага аддзела па надзвычайных сітуацыях Дзяніс Стадольнік паведаміў аб наяўнасці і стане супрацьпажарнага рэжыму ва ўстановах адукацыі. «Парушэнняў няма», — адзначыў прамоўца.
«Калектывы аднесліся да падрыхтоўкі вельмі добрасумленна, зроблена вялікая работа», — станоўчую адзнаку даў падрыхтоўцы спартыўнай базы ўстаноў адукацыі раёна да новага навучальнага года загадчык сектара спорту і турызму райвыканкама Аляксандр Галушка.
Ірына АСТАШЭВІЧ,
начальнік упраўлення адукацыі Карэліцкага раённага выканаўчага камітэта:
— Для падрыхтоўкі ўстаноў адукацыі да новага навучальнага года накіраваны бюджэтныя сродкі ў памеры 41,833 тыс. рублёў. Сума зрасходаваных пазабюджэтных сродкаў склала 13,264 тыс. рублёў, спонсарскіх і папячыцельскіх — 6,082 тыс. рублёў.
З мэтай выканання мерапрыемстваў плана па ўмацаванні матэрыяльна-тэхнічнай базы харчблокаў на 2021-2023 г.г. сёлета набыта неабходнае абсталяванне на суму 7205 рублёў, посуд — на суму 1053 рублі. Заключаны дагаворы, і чакаецца пастаўка неабходнага абсталявання ва ў чатыры ўстановы адукацыі на суму 11690 рублёў. Да пачатку навучальнага года за пазабюджэтныя сродкі плануецца набыццё электрамясарубкі ў ДУА «ДЦРД г.п. Карэлічы» на суму 1300 рублёў.
Галіна СМАЛЯНКА
Фота прадастаўлена ўпраўленнем адукацыі райвыканкама
