Як правесці летнія канікулы з карысцю і пры гэтым папоўніць свой кашалёк. Пра гэта юным карэліччанам расказалі падчас кірмашу вакансій, які 19 мая прайшоў у Карэліцкім маладзёжным цэнтры культуры.
Пытанням часовай працоўнай занятасці моладзі круглы год надаецца вялікая ўвага. Але асаблівую актуальнасць яны набываюць у перыяд летніх канікул. Працаўладкаванне маладых людзей арганізуецца з мэтай далучэння да грамадска-карыснай працы і атрымання працоўных навыкаў. Так, у непаўналетніх з’яўляецца цудоўная магчымасць адаптавацца да працоўнай дзейнасці і падрыхтавацца да самастойнага выхаду на рынак працы. А яшчэ гэта добрая магчымасць падзарабіць.
Намеснік начальніка ўпраўлення па працы, занятасці і сацыяльнай абароне – начальнік аддзела дзяржаўнай службы занятасці насельніцтва Карэліцкага райвыканкама Наталля Гоцка адзначыла, што дзяржава заахвочвае і фінансава стымулюе жаданне моладзі падзарабіць, і паведаміла, што ў раёне для працаўладкавання моладзі дванаццацю наймальнікамі заяўлены шырокі спектр свабодных вакансій у розных сферах дзейнасці – сельскай, жыллёва-камунальнай гаспадаркі, прамысловай вытворчасці і інш. Гэта дазволіць 123 навучэнцам падабраць працу ў адпаведнасці з іх магчымасцямі, станам здароўя і пажаданнямі.
Сёлета цэнтр плануе працаўладкаваць на другасную занятасць больш за 90 школьнікаў. Таксама дала тлумачэнні юрыдычнага аспекту працаўладкавання непаўналетніх.
– Заключэнне працоўнага дагавора дапускаецца з асобамі, якія дасягнулі 16 гадоў. Аднак для выканання лёгкай працы могуць прыцягвацца юнакі і дзяўчаты, якія дасягнулі 14 гадоў, калі адзін з бацькоў дасць пісьмовую згоду, — распавяла Наталля Сцяпанаўна. — Для работнікаў, якія не дасягнулі 18 гадоў, устанаўліваецца скарочаная працягласць працоўнага часу. Асобы ва ўзросце ад 14 да 16 гадоў працуюць не больш за 23 гадзіны на тыдзень, а маладыя людзі ва ўзросце ад 16 да 18 гадоў — не больш за 35 гадзін. Асобы, якія не дасягнулі 18 гадоў, не могуць быць прыцягнуты да працы на цяжкіх работах або работах са шкоднымі і небяспечнымі ўмовамі працы. Іх нельга прыцягваць да работ па сумяшчальніцтве, да начных і звышурочных работ.
Першы сакратар РК ГА “БРСМ” Аксіння Ждан заклікала старшакласнікаў не марнаваць лета дарма, а далучацца да студатрадаўскага руху і ўладкавацца на працу на прадпрыемствы раёна ў складзе студэнцкіх атрадаў. Расказала, якія дакументы неабходна падаць і куды звяртацца.
Маладым людзям, якія жадаюць падзарабіць, былі прадстаўлены розныя варыянты занятасці: індывідуальнае працаўладкаванне, удзел у студэнцкіх атрадах, працаўладкаванне на часовыя працоўныя месцы за кошт сродкаў дзяржаўнага пазабюджэтнага фонду сацыяльнай абароны насельніцтва Рэспублікі Беларусь.
На кірмаш прыйшлі вучні 9”А” класа СШ № 2 г.п.Карэлічы Аляксандр Суран і Дар’я Шах. Яны ў мінулым годзе падчас летняга адпачынку ўжо працавалі і ў гэтым годзе таксама маюць такое жаданне, бо лічаць, што гэта і карысны вопыт, і магчымасць зарабіць.
— Я хачу летам працаваць на птушкафабрыцы “Чырвонаармейская”, — дзеліцца вучань сярэдняй школы г.п.Мір Данііл Янкоўскі. — Сёння прадастаўлена цудоўная магчымасць аставіць свае каардынаты прадстаўнікам сельгаспрадпрыемства, каб працаўладкавацца летам.
Цяпер можна быць упэўненымі, што лета пройдзе для непаўналетніх карэліччан карысна, актыўна і стваральна.
Кацярына КУКАНАВА
Фота аўтара
