3 чэрвеня дзесяць выхаванцаў аздараўленчага лагера «Юны патрыёт» Цырынскай базавай школы разам з выхавальнікам Таццянай Канстанцінаўнай Мулярчык завіталі ва ўстанову «Рэдакцыя газеты «Полымя». Тут іх цёпла сустрэлі супрацоўнікі ўстановы.
Галоўны рэдактар Іна Лейка расказала пра гісторыю стварэння газеты, якая выходзіла ў далёкім 1944 годзе ў партызанскім атрадзе ў выглядзе баявой лістоўкі. Паштальёнамі ў той час былі партызаны, якія дастаўлялі выданне ў вёскі, каб жыхары маглі прачытаць звесткі.
— Прайшло шмат гадоў — і газета змянілася, — адзначыла Іна Іосіфаўна. — Яна мае не толькі іншы выгляд, але на яе старонках друкуецца шмат цікавай і карыснай інфармацыі. Яна выходзіць два разы ў тыдзень — сераду і суботу. Друкуецца ў двух гарадах — Лідзе і Мінску. Газета «Полымя» існуе не толькі ў друкаваным варыянце, ёсць сайт мясцовага выдання.
Галоўны рэдактар паведаміла аб існуючых сацыяльных сетках, у якіх размяшчаецца інфармацыя, фотаздымкі, відэаролікі. Ведучы гаворку аб штучным інтэлекце, заўважыла, што «інтэлект — гэта ўсяго толькі памочнік, але ніколі чалавека ён не заменіць, і не трэба злоўжываць ім».
Вучні таксама наведалі тэхнічны аддзел рэдакцыі, дзе рыхтуюцца чарговыя выпускі раёнкі. Тэхнічны рэдактар Святлана Малахвей паказала дзяўчынкам і хлопчыкам, як на камп’ютары вярстаецца газета, апрацоўваюцца фотаздымкі, рэдакцыйныя матэрыялы змяшчаюцца на сайт выдання.
Напрыканцы экскурсіі быў зроблены агульны здымак на памяць.
Выхавальнік аздараўленчага лагера «Юны патрыёт» Цырынскай базавай школы Таццяна Канстанцінаўна Мулярчык адзначае:
— Гэтая сустрэча ва ўстанове «Рэдакцыя газеты «Полымя» была павучальнай для вучняў. Цяпер яны ведаюць, дзе і як рыхтуецца раённая газета і дзе друкуецца, і адкуль бяруцца навіны. Спадзяюся, што аб гэтым яны раскажуць сваім бацькам, якія выпісваюць і чытаюць «Полымя», а таксама карыстаюцца яе сайтам, каб больш даведацца аб цікавых падзеях, якія адбываюцца ў раёне, вобласці, рэспубліцы.
Галіна СМАЛЯНКА
Фота Іны ЛЕЙКІ
