З 20 па 31 жніўня ў Будапешце (Венгрыя) прайшоў чэмпіянат свету па боксе сярод моладзі. У вагавай катэгорыі да 81 кг выступіў карэліччанін Аляксей Алфёраў, які паказаў трэці вынік на спаборніцтвах сусветнага ўзроўню і найлепшае асабістае дасягненне з пачатку спартыўнай кар’еры.
– У пачатковай школе Лёша быў вельмі актыўным і рухавым хлопчыкам, – успамінае дзяцінства Аляксея маці Кацярына. – Першы трэнер сына Іван Уладзіміравіч Дзёмушкін змог зацікавіць яго трэніроўкамі па боксе, тым самым накіраваць дзіцячую энергію ў правільны бок. Такіх вынікаў мы, безумоўна, не чакалі. Невыказны гонар і неймаверную радасць адчувалі, калі глядзелі чэмпіянат свету анлайн.
У стартавым паядынку Аляксей Алфёраў атрымаў перамогу над супернікам з Грузіі. У чвэрцьфінале карэліцкі спартсмен правёў пераможны бой з амерыканскім баксёрам. На жаль, паўфінальная сустрэча паміж Аляксеем Алфёравым і казахскім спартсменам не адбылася па аб’ектыўных прычынах. Як вынік – у скарбонцы карэліцкага спартсмена бронзавы медаль маладзёжнага сусветнага першынства.
– Лета-2018 выдалася для мяне больш чым насычаным у спартыўным плане, – у тэлефоннай гутарцы дзеліцца Аляксей Алфёраў. – Дваццацідзённыя зборы на Украіне, турнір па боксе ў Германіі, дзе я атрымаў другое месца, потым зноў жа трэніроўкі і спарынгі ў Карпатах і рэспубліканскім цэнтры алімпійскай падрыхтоўкі “Стайкі”. Вось што папярэднічала чэмпіянату свету па боксе, які прынёс мне галоўную перамогу маёй спартыўнай маладзёжнай кар’еры. Якіх поспехаў атрымаецца дасягнуць у дарослым мужчынскім боксе, пакажа час.
Аксана ЯНУШ
Фота з асабістага архіву Аляксея Алфёрова
