На ўрачыстым мерапрыемстве ў Карэліцкім раённым маладзёжным цэнтры стартавала навагодняя дабрачынная акцыя «Нашы дзеці».
Намеснік старшыні Карэліцкага райвыканкама, старшыня РА РГА “Белая Русь” Яўген Чычкан, звяртаючыся да дзяцей, адзначыў:
— Прыемна бачыць вашы радасныя, поўныя ўсмешак твары. Дарагія дзеці, сёння пачынаецца самая добрая і цудоўная акцыя “Нашы дзеці”. Цэлы месяц мы, дарослыя, будзем дарыць вам радасць, весялосць і падарункі. Гэта вясёлая пара. Я віншую вас з пачаткам гэтага мерапрыемства, вялікай акцыі, на працягу якой мы пастараемся павіншаваць вас у школах, зладзіць для вас цікавыя мерапрыемствы. Напярэдадні Новага года жадаю спаўнення заданняў, каб Дзед Мароз прыйшоў у навагоднюю ноч і прынёс тое, што вы пажадалі.
У адказ на пытанне Яўгена Мікалаевіча аб тым, ці напісалі дзеці лісты Дзеду Марозу, па зале пранеслася гучнае і дружнае «Да!». Яўген Мікалаевіч папрасіў дзяцей захаваць свае жаданні ў сакрэце і нікому аб іх не расказваць, інакш яны не збудуцца.
Да віншаванняў далучылася начальнік упраўлення адукацыі райвыканкама, старшыня РА РГА “Беларускі фонд міру” Ірына Асташэвіч:
— Дарагія рабяты, паважаныя настаўнікі, госці! Сёння, 15 снежня, у кожным населеным пункце нашай сінявокай Беларусі адбудзецца акцыя «Нашы дзеці», якая працягнецца да 15 студзеня. Гэтую акцыю называюць яшчэ «марафонам добрых спраў». На працягу гэтага месяца дарослыя будуць дарыць добрыя справы дзецям. Наша раённая ўлада прыняла рашэнне ўручыць салодкія падарункі ўсім вучням 1-4 класаў. Усе, хто тут прысутнічае, атрымаюць навагоднія падарункі, на якія з раённага бюджэта выдзелена 13 тысяч рублёў. 732 падарункі вы атрымаеце падчас навагодніх святаў, якія пройдуць у вашых школах з 26 па 29 снежня. У вас ужо пыталіся, ці напісалі вы навагоднія лісты Дзеду Марозу. А мяне цікавіць, ці папрасіў хто-небудзь што-небудзь для сваіх бацькоў, для браціка ці сястрычкі? Гэта акцыя накіравана на тое, каб аб кім-небудзь клапаціцца. Спытайце ў вашых родных, чаго б яны хацелі на Новы год, і ўпішыце і іх жаданне ў свой ліст. Хачу пажадаць вам моцнага здароўя, каб гэтая акцыя і ўсе навагоднія і калядныя святы прайшлі цікава, весела і бяспечна. Каб усе жаданні, якія вы напісалі, абавязкова збыліся. Няхай збываюцца ўсе вашы жаданні, дарагія дзеці!
Для вучняў пачатковых класаў школ райцэнтра адбылася забаўляльная праграма з удзелам Дзеда Мароза, Снягурачкі і іншых казачных персанажаў. Рабяты ўдзельнічалі ў рухомых гульнях і конкурсах, атрымлівалі падарункі і самае галоўнае — пазітыўныя эмоцыі, якія застануцца з імі надоўга.
Сяргей СТОЛЯР
Фота аўтара
