Тры дні ХV Рэспубліканскага фестывалю нацыянальных культур у Гродне і на Аўгустоўскім канале былі максімальна насычанымі і зноў паспрыялі ўмацаванню дружбы і ўзаемаразумення паміж народамі. Свой турыстычна-культурны патэнцыял прапанавала і Карэліччына. Загадчык аддзела традыцыйнага мастацтва і рамёстваў Юлія Баярэнка расказвае:
— У рамках фестывалю нацыянальных культур адбылося абласное свята «Скарбы Гродзеншчыны», якое гэтым разам здзівіла гледачоў праектам «Вяселле па беларускіх канонах». Кожны раён вобласці правёў рэканструкцыю вясельных абрадаў канца XIX-пачатку XX стагоддзяў. Карэліччына прадставіла абрад «сватанне».
Скрупулёзна падышлі майстры да аднаўлення ўбораў нявесты і жаніха. За ўзор узялі вясельнае фота Міхаіла і Марыі Машчонскіх, зробленае ў сярэдзіне 50-х гг. XX стагоддзі ў вёсцы Саленікі Карэліцкага раёна. Па традыцыі сукенку нявесты і касцюм жаніха ўпрыгожылі зялёнымі галінкамі аспарагуса, які сімвалізуе нараджэнне новай сям’і.
Разыначкай вяселля па-карэліцку стала 200-гадовая скрыпка, якая належала вясельнаму музыку з вёскі Некрашэвічы. Інструмент быў набыты на Стаўбцоўскім рынку за тры мяхі мукі.
Атмасферу сялянскай хаты дапоўнілі старажытныя фатаграфіі, іконы і вясельны альбом XX стагоддзя.
Святочны стол літаральна ламаўся ад пачастункаў: смажаная хатняя каўбаса з цыбуляй і яблыкамі, бульбяныя клёцкі з цыбуляй і салам, варанае мяса, дранікі, бліны па-цырынску і квас натуральнага браджэння.
Асаблівую ўвагу гасцей прыцягнуў вясельны каравай — копія ўнікальных прысмакаў, якія выпякала жыхарка вёскі Заполле Яўгенія Мікалаеўна Арабей. Па сутнасці, сапраўдны твор мастацтва, выпечаны ў звычайнай сялянскай печы, — трох’ярусны, упрыгожаны фігуркамі людзей і жывёл.
Сваё майстэрства дэманстравалі і мясцовыя майстры. Людміла Хвясько пляла карункі, Кацярына Урублеўская вязала ходнікі, Святлана Рахманька паказала майстар-клас па выцінанцы, Вольга Крышэнь ткала паясы, а Аляксандр Заблоцкі здзіўляў вырабамі з дрэва.
Дарэчы, Кацярына Урублеўская, якая прадставіла свой трыпціх «Мірскі замак» у стылі батык, удастоена Дыплома абласнога конкурсу дэкаратыўна-прыкладнога мастацтва «Казкі і паданні майго краю» ў намінацыі «За інтэрпрэтацыю народных традыцый у творчасці».
Госці вяселля былі моцна ўражаны, таму не дзіўна, што Карэліцкі раён атрымаў Дыплом трэцяй ступені ў намінацыі «За лепшую калекцыю традыцыйных рамёстваў».
Дастойна прадставіў сваю творчасць і народны фальклорны танцавальны калектыў “Спадчына”, які заняў другое месца ў конкурсе традыцыйных фальклорных калектываў.
Не засталася ў баку і Карэліцкая раённая бібліятэка, якая прадставіла свае лэпбукі на выстаўцы творчых работ абласнога конкурсу “Лэпбук – гісторыя #4 Рэгіёна” на X абласным фестывалі кнігі “Гродзенскі ЛітФэст”. Лэпбукі былі прадстаўлены ў дзвюх намінацыях: «Гістарычнае Прынямонне» («Мірскі замак: гістарычная спадчына»,»Гістарычныя вехі Карэліччыны») і «Культурная Гродзеншчына» («Лясныя дзівосы Міколы Бусько», «Край мой любы, дзяцінства калыска»). Працавала інтэрактыўная пляцоўка «Карэліччына — зямля любові нашай», на якой гаспадары ярка і маляўніча прадставілі наш сімвал — лён.
— На выставе “Гродзенская вобласць – тэрыторыя камфортнага турызму” Карэліччына была прадстаўлена цікава і разнастайна, — расказвае мастацкі кіраўнік тэатра “Батлейка” пры Мірскім дзяржаўным каледжы Канстанцін Петрыман. — Так, спецыяліст Карэліцкага інфармацыйна-турыстычнага інфацэнтра Валерыя Крываль прапанавала наведвальнікам разнастайныя турыстычныя маршруты і распавядала аб славутасцях і адметнасцях раёна. Манкевіч Дзмітрый, гаспадар сядзібы “Маміны крынкі”, шчыра заахвочваў усіх да наведвання сваёй цудоўнай сядзібы, падмацоўваючы словы магчымасцю пакаштаваць найсмачнейшыя марцыпаны, што падаюцца гасцям у сядзібе. Я з ахвотай знаёміў наведвальнікаў выставы з традыцыяй батлеечных дзеяў ды прапаноўваў самім “ажывіць” ляльку, паспрабаваць сілы ў батлейным мастацтве.
У павільёне Карэліцкага раёна былі таксама прадстаўлены мастацкія вырабы Мірскага дзяржаўнага каледжа і выцінанкі з Карэліцкага раённага Цэнтра культуры і народнай творчасці.
Варта адзначыць цікавасць найперш беларусаў да адметнасцяў краіны. І кожны наведвальнік сапраўды мог знайсці сярод прадстаўленых маршрутаў той, які цалкам адпавядае яго інтарэсам. А суседства Карэліцкага павільёна з выставай Мірскага замка стварала адзіную прастору з незвычайна поўнай канцэнтрацыяй гісторыі, культуры, традыцый і проста шчырых сяброўскіх адносін, што адразу ж перадавалася кожнаму наведвальніку.
Іна ЛЕЙКА
