ТЭМАТЫЧНЫЯ ЛАКАЦЫІ
На галоўнай плошчы райцэнтра шматлюдна. Тут размясціўся і «Горад майстроў» з выставамі і майстар-класамі па саломапляценні, выцінанцы, разьбе па дрэве, ткацтве паясоў, пляценні вяроўкі, мастацкім роспісе па дрэве, вязанні малых круглых палавічкоў.
«Майстры народнай творчасці Карэліччыны вельмі рады бачыць на свяце жыхароў і гасцей раёна, якія праявілі цікавасць да іх вырабаў і паўдзельнічалі ў майстар-класах», — адзначае загадчык аддзела традыцыйнага мастацтва і рамёстваў Карэліцкага РЦКіНТ Юлія Баярэнка і дадае, што для яе гэтае свята — галоўнае свята нашай краіны, якое сімвалізуе мір, спакой і дабрыню нашага народа.
Народны майстар Вера Яўгенаўна Салдатава з аграгарадка Райца паведала аб тым, што на свяце прадстаўляе майстар-клас па саломапляценні «Віфліемская зорка». «Я ўсё жыццё прапагандую салому і здаровы лад жыцця. Каб людзі будавалі хаты з саломы і пакрывалі ёй дахі, каб былі прыгожыя сумачкі і капелюшы, упрыгожвалі жыллё саламянымі вырабамі. Ганаруся, што мае працы ўвайшлі ў Спіс ЮНЕСКА як нематэрыяльная спадчына Беларусі», — адзначыла Вера Яўгенаўна.
Да размовы далучаецца культарганізатар філіяла «Красненскі Дом культуры» Святлана Дубчонак, якая праводзіць майстар-клас па вырабу браслета з саломкі. Яна адзначыла, што салома — вядомы матэрыял у Беларусі і выкарыстоўваецца ў творчасці, і ёй хочацца перадаваць гэтае захапленне маладому пакаленню.
Знаёмлюся з наступнымі ўдзельнікамі свята. «Віншуем цябе, Беларусь Незалежная!» — агульная назва інтэрактыўных фотазонаў ДУК «Карэліцкая раённая бібліятэка». Тут прадстаўлены творы пра Вялікую Айчынную вайну і родную Беларусь, і новая кніга «Наш Президент». Аформлена выстава фатаграфічнай інфармацыі «Сімвал Перамогі — кірзавыя боты», бібліядартс «Беларусь гераічная, Беларусь самабытная, Беларусь літаратурная». Арганізавана дзіцячая пляцоўка, праводзяцца інтэрактыўныя пазнавальныя гульні і віктарыны для дзяўчынак і хлопчыкаў.
Карэліцкі раённы цэнтр творчасці дзяцей і моладзі прадставіў забаўляльную гульнявую праграму для дзяцей «Фактар колеру і Аквагрым», за ўдзел у якой ўдзельнікі атрымлівалі прызы. А вось РК ГА «Беларускі рэспубліканскі саюз моладзі» падрыхтаваў фотазону, развіваючыя і інтэлектуальныя гульні, і сваёй мэтай падчас сустрэчы ставілі прыцягваць дзяўчат і юнакоў уступаць у свае рады, каб прымаць актыўны ўдзел у жыцці роднай Беларусі.
«Нас яднае любоў да краіны» — тэматычная фотавыстава Карэліцкага сырцэху. На ёй інфармацыя аб выпускаемай прадукцыі, працоўных перамогах, узнагародах на конкурсах, не толькі ў Беларусі, але і за яе межамі. Паведамляецца аб удзеле ў грамадскім жыцці раёна, спартыўных спаборніцтвах, перадавіках вытворчасці.
На свята завіталі і прадстаўнікі філіяла «Навагрудскія дары» «Лідскі малочна-кансервавы камбінат». Яны прывезлі малочную прадукцыю ў асартыменце: розныя сыры, масла сметанковае, тварог, дысерты і марожанае ад малочнага камбіната г. Смаргонь.
На «Тэрыторыі беларускага пачастунку» гутару з прадаўцом магазіна «Родны кут» райцэнтра Карэліцкага філіяла Гродзенскага абласнога спажывецкага таварыства Станіславай Вадап’ян. «Мы сёння прадставілі на свята беляшы, сасіскі ў цесце, чабурэкі, піражкі ў вялікім асартыменце, шашлыкі са свініны і курыцы, каўбаскі свіныя, а таксама розныя напоі, агародніну і садавіну. Будзем імкнуцца ўсё прадаць і каб пакупнікі былі задаволены нашай прадукцыяй», — гаворыць прадавец і канстатуе той факт, што на працу ў дадзеную галіну прыйшла ў 1983 годзе, і з таго часу кожны год гандлюе на розных раённых святах. Дзень Незалежнасці Рэспублікі Беларусь для яе своеасаблівае свята: яно аб’ядноўвае людзей, і карэліччане, і госці могуць адпачыць душой і купіць іх прадукцыю.
«БЕЛАРУСКІ КІРМАШ»
Накіроўваюся на стадыён «Юнацтва» г.п. Карэлічы. Тут алея інсталіраваных пляцовак «Беларускі кірмаш». Адразу завітваю на Малюшыцкі кірмаш. Яго гаспадыні паведалі аб наступным: «Паколькі дырэктар прадпрыемства родам з Арменіі, то прыгатавалі «шах-плоў», інтэрнацыянальную страву для гасцей з г. Краснагорска. Асаблівасць гэтага плову ў тым, што замест мяса кладзецца сухая агародніна. Яшчэ ў асартыменце — малюшыці хлеб, булачкі, беляшы, а таксама беларускія стравы: дранікі, бліны, сала, агуркі, памідоры. На кірмашы падрыхтавана інфармацыя пра Хлеб, які ратаваў жыцці прадзедаў. Побач сімвал Беларусі — буслы.
КСУП «Племзавод «Карэлічы» запрашае гасцей беларускімі народнымі песнямі. Тут і більярд, на якім можна паіграць беларускай бульбай замест шароў, а замест кіёў будуць цяпкі. Чакае і конкурс армрэслінг для мужчын: хто мацнейшы па сіле ў руках, і змагацца яны будуць на вялікай бочцы. Таксама племзаводаўцы падрыхтавалі фотазону, прысвечаную Дню Незалежнасці Рэспубліцы Беларусь, у выглядзе сэрца «Я люблю Беларусь». Яна з кветак чырвонага і зялёнага колеру, яе зрабілі сваімі рукамі, у ёй перадалі ўсю любоў да роднай краіны. На стале гасцей чакалі беляшы, чабурэкі, кексы, дамашняя выпечка, каб паказаць сваю гасціннасць.
Беларускую хату прадставіў СВК «Свіцязянка-2003». У ёй — вышытыя абрусы і ручнікі, тканыя дзяругі і палавікі, а таксама стол для гасцей з беларускімі стравамі: дранікі, бабка, сала смажанае, бульба, курыца запечаная, рулеты ў асартыменце, беляшы, каўбаскі, шашлыкі. Тут хочуць павіншаваць са святам гасцей з Краснагорска, пачаставаць беларускімі стравамі. Сустракаюць гаспадыня Ганна і гаспадар Саўка. Як гаворыцца, па-беларуску і па-народнаму.
Вялікі і багаты сялянскі падворак прыцягнуў увагу. На ім адлюстравана ўсё сялянскае жыццё і звычаі. Вочы радуюць рушнікі, абрусы, дзяружкі, якія захаваліся ад продкаў. А яшчэ тут шмат палявых кветак, асабліва кранаюць васількі і рамонкі. Тут таксама вырашылі прыняць гасцей сялянскімі стравамі і пачаставаць маладой бульбай са шкваркамі і каўбасой, паляндвіцай, салам, маласольнымі агуркамі, марынаванай капустай, дамашнім кампотам. «На жухавіцкай зямлі ўмеюць не толькі добра працаваць і адпачываць, але і прымаць гасцей», — адзначыла загадчыца сталовай СВК «Жухавічы» Святлана Сасімовіч.
ВЫСТАВА ТЭХНІКІ
Вось дзе сапраўды сэрца радуецца па-добраму. Магутная, прыгожая і новенькая тэхніка на выставе. Побач мітусяцца яе ўдзельнікі, прыглядаюцца да яе і цікавяцца ў гаспадроў пра волаты-машыны, якія ў сваю чаргу даюць тлумачэнні. Вось толькі найбольшую цікавасць праяўляюць дзеці, якія просяцца пасядзець у кабіне магутнай машыны і камбайна. Іх цікавасць зразумелая: дзе яшчэ і калі выпадзе такая магчымасць.
На выставе тэхнікі знаёмлюся з Юрыем Мікалаевічам Тананкам. Ён камбайнер з 25-гадовым стажам працоўнай дзейнасці з КУСП «Чарняхоўскі-Агра».
— Прыехаў на свята з новым камбайнам GS 12А1, які атрымаў у чэрвені гэтага года, — гаворыць Юрый Мікалаевіч. — Я пачынаў працаваць на камбайне «Дон-1500» камбайнерам, затым — на «Лідзе-1600», пазней — на GS 1218. І вось новы камбайн, па ліку ўжо чацвёрты.
— І што, Вы задаволены? — цікаўлюся ў суразмоўцы.
— Я разумею так: калі не я, то хто. Працаваць трэба, каб не сорамна было глядзець людзям у вочы. Вось дзеці цікавяцца тэхнікай — хочуць пасядзець у кабіне. Дык няхай, магчыма, хтосьці з іх будзе камбайнерам. Некаму трэба вырошчваць і ўбіраць хлеб.
Галіна СМАЛЯНКА
Фота Ларысы ШУГЛІ
