Паказальны гаражна-будаўнічы кааператыў сёння — далёкая ад рэальнасці гісторыя. Часта аб’яднаныя ў кааператыў уладальнікі, атрымаўшы жаданае машынамесца, не турбуюць сябе клопатамі пра жыццё ў кааператыве. Пры гэтым яны часта не заўважаюць, як каля іх гаража вырастаюць цэлыя горы смецця.
Карэліцкая раённая інспекцыя прыродных рэсурсаў і аховы навакольнага асяроддзя правяла рэйд па гаражных кааператывах райцэнтра. Карціна непрывабная: у 12 з іх было выяўлена больш за 20 парушэнняў. У асноўным яны тычыліся несанкцыянаванага размяшчэння адходаў, устаноўкі смеццевых кантэйнераў і пляцовак.
— Згодна з тэхнічным кодэксам устаноўленай практыкі, смеццевыя кантэйнеры павінны стаяць на цвёрдым пакрыцці. Гэта можа быць асфальт, бетон або асфальтабетон, — кажа галоўны спецыяліст раённай інспекцыі прыродных рэсурсаў і аховы навакольнага асяроддзя Сяргей Сянкевіч. — Кантэйнеры павінны быць накрытыя або знаходзіцца на агароджанай пляцоўцы. Таксама на смеццевых кантэйнерах павінна быць маркіроўка збіраемага адходу (шкло, пластык, ТКА). Для гаражных кааператываў абавязкова наяўнасць двух бочак аб’ёмам не больш за 400 літраў для адпрацаванага машыннага масла і іншых вадкасцяў, якія нельга выліваць на зямлю (такіх як, напрыклад, тасол).
Па словах Сяргея Сяргеевіча, на момант правядзення першага маніторынгу самая вялікая колькасць парушэнняў была выяўлена ў гаражным кааператыве «Аўтарэйн», пасля чаго быў дадзены тэрміны для іх ліквідацыі. Смецце неабходна было вывезці да 21 мая, а кантэйнерныя пляцоўкі да 1 чэрвеня павінны былі быць прыведзены ў парадак.
Шмат заўваг было выяўлена і ў гаражным кааператыве «Бумер-5». Там было ўстаноўлена несанкцыянаванае размяшчэнне адходаў у выглядзе зношаных шын, кавалкаў шкла, валялася адпрацаваная люмінесцэнтная лямпа. На тэрыторыі кааператыва было ўстаноўлена два кантэйнеры для збору смецця, але яны былі ў неналежным стане — на іх прысутнічалі скразныя дзіркі і адсутнічала маркіроўка. Па стане на 5 чэрвеня смецце вывезлі, усталявалі адзін дадатковы кантэйнер. Аднак адзін з членаў кааператыва вырашыў, што тут выдатнае месца, каб выкінуць старую драўляную мэблю. У дачыненні да мужчыны быў складзены адміністрацыйны пратакол і вынесена папярэджанне.
— На працягу года мужчына не прыцягваўся да адказнасці па дадзеным артыкуле, прызнаў сваю віну, раскаяўся, таму вынеслі пастанову аб спыненні справы, — тлумачыць начальнік райінспекцыі прыродных рэсурсаў і аховы навакольнага асяроддзя Уладзімір Саковіч. — Але, калі цягам года мы прыедзем і знойдзем там смецце, вымушаны будзем выпісаць яму штраф да 30 базавых адзінак.
Паўторная праверка гаражных кааператываў паказала, што ў 10 з іх парушэнні былі выпраўленыя. Вялася работа па навядзенні парадку: смецце было прыбрана і вывезена, смеццевыя кантэйнеры паправілі і падфарбавалі. Асабліва пастараліся ў кааператыве “Каўбаснік”, дзе ўсе рэкамендацыі спецыялістаў былі выкананы ў поўным аб’ёме.
На жаль, члены кааператыва “Аўтарэйн” не прыслухаліся да слоў спецыялістаў. На тэрыторыі бардак. Няма ніводнага кантэйнера, адсутнічае нават пляцоўка пад іх. Вакол вельмі шмат будаўнічага смецця, абломкаў цэглы і блокаў. Таму ў дачыненні да старшыні, а таксама самой юрыдычнай асобы гаражны кааператыў “Аўтарэйн” было вынесена папярэджанне аб несанкцыянаваным размяшчэнні адходаў. Калі патрабаванне не будзе выканана, прыйдзецца заплаціць штраф.
А наогул жыццё яшчэ раз даказвае, што ўсё ў канчатковым выніку залежыць ад чалавека. Калі ён добры гаспадар у сваім доме, то і на працы, і на дачы, і ў гаражы ў яго таксама будзе парадак. Аднак наракаць толькі на нядбайных членаў кааператываў нельга: так праца не зрушыцца з месца. Трэба даносіць уладальнікам гаражоў, што разам з пабудовай набываецца і доля адказнасці, а дзейнасць кааператываў ажыццяўляецца толькі за кошт членскіх узносаў уладальнікаў гаражоў. Гэта і грэйдзіраванне дарог, і ўборка снегу і смецця, і энергазабеспячэнне. Кожны гаражны кааператыў абавязаны сачыць за добраўпарадкаваннем сваёй тэрыторыі і тэрыторыі, прылеглай да кааператыву. Пры незахаванні нормаў і правілаў кааператыў нясе поўную адказнасць як юрыдычная асоба. Штрафы, напрыклад, за смецце, якое знаходзіцца на яго тэрыторыі, могуць скласці да 1 тысячы базавых велічынь. Гэтая сума, натуральна, падзеліцца на ўсіх членаў кааператыва: агульная тэрыторыя — агульная і адказнасць.
Сяргей СТОЛЯР
Фота аўтара
