13 мая на галоўнай плошчы г.п. Карэлічы праведзены фестываль «Сем’і за мір і стварэнне!» ў рамках рэспубліканскай акцыі «Мая сям’я — мая краіна».
Яго ўдзельнікі — сем’і, якія выхоўваюць дзяцей і праявілі сябе на вытворчасці і ў грамадскай дзейнасці.
Ініцыятары — Карэліцкае раённае аб’яднанне прафсаюзаў, упраўленне па працы, занятасці і сацыяльнай абароне насельніцтва Карэліцкага райвыканкама, арганізацыі і прадпрыемствы раёна.
Павіншаваў удзельнікаў свята і ўручыў памятныя падарункі намеснік старшыні Карэліцкага раённага выканаўчага камітэта, старшыня РА РГА «Белая Русь» Яўген Чычкан.
Лепшыя словы пажаданняў адрасаваў благачынны цэркваў Карэліцкай акругі протаірэй Мікалай Орса.
МОЙ ДОМ — МАЯ КРЭПАСЦЬ
На сцэну запрашаюцца шматдзетныя сем’і. Сіроціны Галіна Станіславаўна і Дзмітрый Валяр’янавіч з аграгарадка Райца. У сям’ і — трое дзяцей. Па выніках раённай спартакіяды «Тата, мама, я — спартыўная сям’я» ўзнагароджаны Дыпломам І ступені.
З аграгарадка Краснае прыехала на свята сям’я Шэўка: Наталля Георгіеўна і Валерый Іванавіч, якія выхоўваюць траіх дзяцей. У сям’і беражліва захоўваюць памяць аб прадзядулі — франтавіку Мікалаю Мікалаевічу Сілко. З яго партрэтам яны штогод ідуць у калоне ўдзельнікаў рэспубліканскай патрыятычнай акцыі «Беларусь памятае». У памяць пра свайго прадзядулю Максім Шэўка расказаў пра яго франтавы шлях і пасляваеннае жыццё.
У шматдзетнай сям’і Наталлі Міхайлаўны і Сяргея Мікалаевіча Какарэка — чацвёра дзяцей. Трое з іх вучацца ў сярэдняй школе № 2 г.п. Карэлічы, а самы малодшы Мацвей — выхаванец дзіцячага сада № 2 г.п. Карэлічы. Сям’я з’яўляецца пераможцай раённай спартакіяды «Тата, мама, я — спартыўная сям’я».
Анастасія Мікалаеўна і Аляксандр Вячаслававіч Есьманы радуюцца тром цудоўным дзяўчынкам: Карыне, Ангеліне і Ксеніі. Сям’я любіць спорт і актыўна падарожнічае па гістарычных мясцінах роднай Беларусі.
Трое дзяцей выхоўваюцца ў сям’і Таццяны Дзмітрыеўны і Віктара Аляксандравіча Сачук з г.п. Мір. Адна з сямейных традыцый — штогод 9 мая наведваць памятныя мясціны, якія звязаны з гісторыяй Вялікай Перамогі.
Вераніка Леанідаўна Кулак і яе чацвёра дзяцей — цудоўная сям’я. Іван, Пётр, Ангеліна, Кацярына — радасць маці. Іван і Ангеліна з’яўляюцца стыпендыятамі Фонда Прэзідэнта Рэспублікі Беларусь па падтрымцы таленавітай моладзі. Маці ўпэўнена, што сямейныя традыцыі — вялікая каштоўнасць і духоўнае багацце, на якіх трэба выхоўваць дзяцей.
ПАД ДАХАМ ДОМА АДНАГО
У сям’і Анжэлы Мікалаеўны і Паўла Іосіфавіча Гулецкіх з ДП «Лукі-Агра» выхоўваецца двое дзяцей. Яны вучацца ў Цырынскай сярэдняй школе і з’яўляюцца актыўнымі ўдзельнікамі раённых спаборніцтваў па лёгкай атлетыцы, валейболе, баскетболе.
Ушаноўваецца сям’я Загарэўскіх: Ларыса Мікалаеўна і Андрэй Мікалаевіч. У сям’і растуць Анастасія і Арцём, якія вучацца ў Аюцавіцкай базавай школе. Анастасія заняла другое месца ў раённым конкурсе «Выратавальнік вачыма дзяцей».
На Карэліччыне добра ведаюць сям’ю Шышкір з аграгарадка Райца. На радасць матулі Таццяне Віктараўне і тату Аляксею Юр’евічу растуць цудоўныя дочкі Сафія і Ганна. Сям’я Шышкір удастоена Дыплома ІІ ступені ў абласным экскурсійна-пазнавальным конкурсе з элементамі пачатковай тэхнічнай творчасці «З міру па нітцы» ў намінацыі «Сямейная майстэрня». Аляксей Юр’евіч — настаяцель царквы святой Варвары, якая вядома далёка за межамі нашага раёна, святар вядзе вялікую работу па захаванні гэтага гістарычнага аб’екта
Святлана Уладзіміраўна і Аляксандр Іосіфавіч Сасімовічы — жыхары аграгарадка Вялікія Жухавічы. Выхоўваюць дваіх дзяцей. Любоў да іх, працавітасць, мэтанакіраванасць, жаданне бачыць у сваіх дзецях адлюстраванне лепшых чалавечых якасцей — галоўны дэвіз сям’і.
Дзмітрый Уладзіміравіч Горбік і Ірына Васільеўна Каско стварылі добрую сям’ю, у якой двое дзяцей. Яны з’яўляюцца вучнямі сярэдняй школы № 1 г.п. Карэлічы. Усёй сям’ёй любяць велапрагулкі, наведваць і аказваць дапамогу бабулям і дзядулям.
У сям’і Наталлі Віктараўны і Сяргея Міхайлавіча Сініца з аграгарадка Ярэмічы з дзяцінства прывіваюць дзецям навыкі гасціннасці, павагі да людзей старэйшага пакалення.
Наталля Вячаславаўна і Вячаслаў Вячаслававіч Свірыдавы — жыхары райцэнтра. Іх дзеці Марк і Мілена вучацца ў сярэдняй школе № 2 г.п. Карэлічы. Сям’я любіць праводзіць час разам, падарожнічаць па цікавых мясцінах Беларусі.
У аграгарадку Турэц жыве сям’я Анастасіі Аляксандраўны і Мікалая Аляксандравіча Жук, у ёй растуць Яраслаў і Ульяна. Сям’я мае багатыя традыцыі, сумесна з дзецьмі ходзяць у паходы, арганізоўваюць святы, дні добрых і карысных спраў.
Дружная сям’я і ў Ліліі Аляксандраўны і Максіма Мікалаевіча Кудзіных з г.п. Карэлічы, у якой двое дзяцей. Аляксандр з’яўляецца студэнтам першага курса Беларускага дзяржаўнага эканамічнага ўніверсітэта, а Валерыя разам з мамай любіць маляваць і рабіць сувеніры ручной работы.
ЗГОДА І ЛАД — У СЯМ’І КЛАД
50-годдзе сумеснага жыцця — адна са значных падзей у жыцці сям’і. Сімвалам юбілею з’яўляецца дарагі метал усіх часоў — золата. Людзі, якія пражылі разам паўстагоддзя, змаглі даказаць узаемнае каханне, павагу, давер, адданасць адзін аднаму.
Радуе, што на Карэліччыне ёсць такія людзі, сярод іх — сям’я Івана Аляксеевіча і Алы Канстанцінаўны Калбаска з райцэнтра. Яны выхавалі дваіх дзяцей, маюць траіх унукаў, адну праўнучку.
40 гадаў сумеснага жыцця ў шлюбе — рубінавае вяселле. Рубін лічыцца камнем вернай любові, шчаслівага сямейнага жыцця. Гэта адзін з самых цвёрдых мінералаў у прыродзе. Такі ж трывалы саюз сямейных пар, якія пражылі разам 40 гадоў: Мікалай Паўлавіч і Алена Іванаўна Чэчат і Віктар Мікалаевіч і Ала Аркадзьеўна Шэўка з аграгарадка Цырын.
Жамчужнае вяселле адзначаюць сямейныя пары, якія пражылі ў шлюбе 30 гадоў і не разлучыліся за тры дзясяткі гадоў, а гэта азначае, што іх каханне сапраўды праверана часам. На свята запрашаліся сем’і Сяргея Анатольевіча і Наталлі Аляксандраўны Бразоўскіх з г.п. Карэлічы, Марыны Яўгеньеўны і Валерыя Пятровіча Пятровіч з агр. Аюцавічы, Фёдара Мікалаевіча і Таццяны Аркадзьеўны Жук з вёскі Некрашэвічы, Віктара Іванавіча і Наталлі Аляксандраўны Нарбутовіч з агр. Аюцавічы. Валерыя Віктаравіча і Таццяны Анатольеўны Кулак з аграгарадка Райца, Віктара Віктаравіча і Ірыны Антонаўны Саўко з вёскі Баранавічы, Уладзіміра Аркадзьевіча і Валянціны Аляксандраўны Гіз з аграгарадка Малюшычы.
На ўрачыстасці былі ўшанаваны сярэбраныя юбіляры — сем’і Васілія Віктаравіча і Алены Леанідаўны Александровых з г.п. Карэлічы, Аляксандра Дзмітрыевіча і Алены Васільеўны Ханько з г.п. Мір, Юрыя Валянцінавіча і Таццяны Іванаўны Паляковых з аграгарадка Цырын, Івана Яўгеньевіча і Таццяны Аляксандраўны Ходар з аграгарадка Турэц, Георгія Аляксандравіча і Таццяны Уладзіміраўны Валчок з аграгарадка Лукі, Алега Аляксандравіча і Марыны Аляксандраўны Саладуха з аграгарадка Малюшычы, Івана Анатольевіча і Ірыны Сяргееўны Кучко з вёскі Баранавічы, Дзмітрыя Аляксандравіча і Наталлі Уладзіміраўны Гіль з аграгарадка Палужжа.
СЯМ’Я — КЛЮЧ ДА ШЧАСЦЯ
Да ўдзельнікаў фестывалю звярнулася начальнік аддзела запісу актаў грамадзянскага стану Карэліцкага раённага выканаўчага камітэта Валянціна Сіўко. Прамоўца адзначыла, што сям’я — самы каштоўны скарб, які людзі будуць мець у жыцці. Кожны чалавек можа пабудаваць дом мары, але ён будзе там усё роўна адзінокім. Як важна, каб яго там чакалі і любілі, разумелі і прымалі такім, які ён ёсць. Разам лягчэй супрацьстаяць жыццёвым цяжкасцям і радавацца поспехам і дасягненням.
Валянціна Міхайлаўна асноўным назначэннем сям’і назвала нараджэнне і выхаванне дзяцей. Вельмі важна, каб сям’я была трывалай, у ёй дзіця вучыцца сакрэтам зносін паміж людзьмі, любові і клопату. Праз сям’ю ад аднаго пакалення да другога перадаюцца традыцыі, мудрасць, веды. Усё часцей у нашай рэспубліцы разглядаюцца пытанні ўмацавання аўтарытэту сям’і, павышэння нараджальнасці, падтрымкі старэйшага пакалення, фарміравання ў моладзі пачуцця адказнасці і павагі ў сям’і.
Валянціна Сіўко павіншавала ўсіх удзельнікаў фестывалю са святам і пажадала, каб у іх сэрцах жыла любоў, дзякуючы якой адбываюцца сапраўдныя цуды, і галоўным будуць шчасце і ўсмешкі дзяцей.
Цудоўныя мелодыі падарылі ўдзельнікам фестывалю работнікі культуры раёна. Яны сталі для іх добрым падарункам да свята — Дня сям’і.
Галіна СМАЛЯНКА
Фота Кацярыны КУКАНАВАЙ і Іны ЛЕЙКІ
Відэа Сяргея СТОЛЯРА
