Кветкі, падарункі, усмешкі і шчырыя віншаванні – без гэтых святочных атрыбутаў нельга ўявіць Міжнародны жаночы дзень. На Карэліччыне віншаванні прадстаўніцы прыгожай паловы чалавецтва прымаюць не толькі ад блізкіх і родных, але і на вялікіх раённых мерапрыемствах.
Па добрай традыцыі напярэдадні 8 сакавіка прайшоў урачысты прыём жанчын у старшыні Карэліцкага райвыканкама Андрэя Гардзея. Запрашэнне стаць яго ўдзельніцамі сёлета атрымалі 27 жанчын раёна. Сярод прадстаўніц прыгожай паловы тыя, хто дасягнуў поспехаў у прафесіі, актыўныя ў грамадскіх і добрых справах. Прыбраныя, яркія, яны за мілымі ўсмешкамі ўмела хавалі свае хваляванні.
Мерапрыемства пачалося з віншавання навучэнцаў сярэдняй школы №1 г.п. Карэлічы.
Віншуючы жанчын са святам вясны, старшыня райвыканкама Андрэй Гардзей адзначыў іх прыгажосць і абаяльнасць, мудрасць і працавітасць.
— Паважаныя жанчыны! На цеплыні вашых сэрцаў, матчыным клопаце захоўваюцца мір і згода ў сем’ях. Сёння вы не толькі захавальніцы сямейных каштоўнасцяў, вы на адным узроўні з мужчынамі ўносіце важкі ўклад ва ўмацаванне дабрабыту нашай краіны. Вы наглядна дэманструеце ўменне гарманічна спалучаць гэтую святую місію з паспяховай працай і актыўнай грамадзянскай пазіцыяй. Валодаеце здольнасцямі ярка праяўляць сябе ва ўсіх сферах жыцця, даказваючы, што вам падуладна ўсё. Прыемна, што ў вашай асобе магу павіншаваць дастойных прадстаўнікоў лепшай паловы чалавецтва, якія сваёй працай, сваім стаўленнем да справы, актыўнай грамадзянскай пазіцыяй спрыяюць развіццю нашага рэгіёна, — звярнуўся да прысутных кіраўнік раёна. — Напярэдадні свята хачу пажадаць вам здароўя, шчасця, хатняй утульнасці, мужчынскай увагі, дзіцячага смеху, сонечных дзён і, калі слёз, то толькі радасці. Са святам!
Падчас шчырай размовы з жанчынамі Андрэй Валер’евіч не аднойчы адзначаў, што сёння жанчынам адкрыты ўсе магчымасці для раскрыцця патэнцыялу і асобаснага развіцця. Яны паспяхова ўдзельнічаюць у сацыяльным, палітычным, эканамічным і культурным жыцці краіны. Але самае галоўнае, што ў любыя часы нашы маці, сёстры, жонкі застаюцца сімвалам пяшчоты, надзейнасці і спакою.
У сваю чаргу жанчыны расказвалі пра сябе, дзяліліся сакрэтамі шчаслівага сямейнага жыцця і мацярынства, а таксама цёпла і шчыра дзякавалі кіраўніцтву раёна не толькі за цёплы прыём, кветкі, падарункі, віншаванні, але і ўвагу, падтрымку, якія аказваюцца з боку кіраўніцтва краіны, прадстаўнікоў мясцовай вертыкалі ўлады.
Марына Каспяровіч з ДП “Птушкафабрыка “Чырвонаармейская” не хавае хвалявання, апынуўшыся ў ліку запрошаных на такое значнае мерапрыемства. Жанчына дваццаць сем гадоў адпрацавала ўпраўляючай МТФ “Любна”, а зараз на заслужаным адпачынку, але працягвае працаваць бухгалтарам на карысць гаспадаркі.
— Шчыра, я не чакала, — прызнаецца яна, усміхаючыся. — Калі даведалася, што буду ў якасці запрошаных на ўрачыстым прыёме, нават трохі разгубілася. Гэта ж падзея раённага ўзроўню! Але ўсё прайшло вельмі цёпла і па-сяброўску шчыра.
Эканаміст Карэліцкага РУП ЖКГ Вераніка Хвалько падзялілася:
— Удзел у мерапрыемстве такога ўзроўню — гэта ганарова і хвалююча! Уразіла сама ўрачыстасць і, безумоўна, было цікава прысутнічаць пры размове з кіраўніком раёна. Пачуццё гумару і прастата ў зносінах Андрэя Валер’евіча з удзельніцамі мерапрыемства хутка разрадзілі абстаноўку і знялі хваляванне, якое прысутнічала ў пачатку мерапрыемства. Больш за гадзіну размовы праляцела зусім незаўважна. Хочацца выказаць словы падзякі дзецям, работнікам культуры за прыемныя моманты сустрэчы.
Быць сярод запрошаных на ўрачыстым прыёме для аператара машыннага даення з СВК “Свіцязянка-2003” МТК “Райца-2” Галіны Кухарчык таксама стала прыемнай нечаканасцю, але адначасова і вялікай адказнасцю.
— Гэта не проста праца — гэта справа амаль ўсяго майго жыцця, – з цеплынёй дзеліцца жанчына. – Тое, што я апынулася тут сёння, — гэта ў першую чаргу заслуга ўсяго нашага выдатнага калектыву. Гэта не толькі мая ўзнагарода, гэта прызнанне працы ўсёй нашай каманды, усіх тых, хто штодня ўкладвае душу ў развіцце сельгаспрадпрыемства. Я з гонарам магу сказаць, што працую з сапраўднымі прафесіяналамі, людзьмі, якія шчыра адданыя сваёй справе.
Усе жанчыны атрымалі прыгожыя букеты вясновых кветак і падарункавыя сертыфікаты. Жанчыны дзякавалі за цёплыя словы кіраўніцтва раёна ў іх адрас, адзначылі, што такія сустрэчы надаюць жадання і сіл, з’яўляюцца стымулам для далейшай паспяховай працы.
Гарманічным дадаткам да цудоўнага вясновага мерапрыемства сталі музычныя нумары ў выкананні ўзорнай вакальнай групы “Арыета” і мастацкага кіраўніка гурта “Імпульс” Ірыны Бондаравай.
Кацярына КУКАНАВА
Фота Іны ЛЕЙКІ
