Сёлета ўсебеларуская патрыятычная акцыя “Мы – грамадзяне Беларусі!», прысвечаная Дню Канстытуцыі, стартавала 10 сакавіка.
14 сакавіка, напярэдадні дзяржаўнага свята, Дня Канстытуцыі, у раённым Цэнтры культуры і народнай творчасці прайшла ўрачыстая цырымонія ўручэння пашпартоў. Галоўнымі героямі ўрачыстасці сталі 14-гадовыя юнакі і дзяўчаты – прадстаўнікі розных куткоў Карэліччыны.
Дзень Канстытуцыі ў Беларусі штогод адзначаецца 15 сакавіка як дзяржаўнае свята. Асноўны закон краіны вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з’яўляецца важным фактарам для фарміравання грамадзянскай ідэнтычнасці і нацыянальнай самабытнасці беларусаў. Патрыятычная ініцыятыва была прапанавана БРСМ у 2004 годзе. За гэтыя гады яна набыла шырокую папулярнасць сярод моладзі і па праве лічыцца адной з важных традыцый нашай краіны. Урачыстае ўручэнне нацыянальных пашпартоў падлеткам падкрэслівае іх пераход у дарослае жыццё, дазваляе яшчэ лепш усвядоміць, што цяпер яны сталі паўнапраўнымі грамадзянамі Беларусі, адказнымі перад ёй і яе законамі.
Са словамі віншавання з нагоды Дня Канстытуцыі да прысутных звярнуўся старшыня Карэліцкага райвыканкама Андрэй Гардзей:
– Паважаныя прысутныя! Прыміце шчырыя віншаванні напярэдадні асаблівага, значнага для кожнага, хто шчыра любіць сваю Радзіму, дня – Дня Канстытуцыі Рэспублікі Беларусь! Менавіта гэты дакумент заклаў трывалы прававы падмурак незалежнасці, рэалізаваў імкненне беларускага народа быць паўнапраўнымі гаспадарамі на роднай зямлі. А замацаваныя ў Законе каштоўнасці, такія як сацыяльная справядлівасць, традыцыйная сям’я, гістарычная праўда, з’яўляюцца для нас вернымі арыенцірамі, якія дапамагаюць пераадольваць сучасныя выклікі і ўпэўнена глядзець у будучыню. Канстытуцыя Рэспублікі Беларусь увасабляе ў сабе пераемнасць і вопыт шматвяковага гістарычнага шляху Беларусі, азначае новы этап у палітычным і сацыяльна-эканамічным развіцці краіны. Яна грунтуецца на неад’емным суверэнным праве беларускага народа мець сваю дзяржаўнасць і быць паўнапраўным суб’ектам сусветнай супольнасці. Галоўны Закон гарантуе кожнаму грамадзяніну свабоды і правы, неабходныя для стваральнай працы, годнага жыцця і гарманічнага ўсебаковага развіцця асобы.
Больш чым за тры дзясяткі гадоў мы, дзякуючы канстытуцыйным прынцыпам, выбудавалі такую дзяржаву і грамадства, у якім кожны адчувае сябе грамадзянінам і нясе адказнасць за тое, што адбываецца ў краіне. Няўхільнае прытрымліванне палажэнням Канстытуцыі – гэта заклад стабільнага развіцця дзяржавы, прафесійных, інтэлектуальных, спартыўных і творчых поспехаў. Выконваць галоўны Закон краіны і ўмацоўваць дзяржаўнасць – патрыятычны абавязак кожнага з нас.
Няхай Дзень Канстытуцыі будзе для ўсіх нас днём гонару за сваю Айчыну!
Напрыканцы сваёй прамовы Андрэй Валер’евіч, звярнуўшыся да юнакоў і дзяўчат, выказаў перакананне, што яны, маладыя, мэтанакіраваныя, энергічныя, абавязкова ўнясуць свой важкі ўклад у далейшае паспяховае ўмацаванне краіны, будуць памятаць і шанаваць сваю гісторыю, берагчы законы, будуць справядлівымі і сумленнымі ў сваіх думках і ўчынках. А таксама выказаў упэўненасць, што разам мы зробім усё для дабрабыту і працвітання раёна, вобласці, краіны. Пажадаў поспехаў, добрага здароўя і шчасця, новых дасягненняў, міру і згоды.
Кіраўнік раёна ўручыў пашпарты і падарункавыя выданні “Я – грамадзянін Рэспублікі Беларусь” дзесяці навучэнцам устаноў адукацыі раёна.
Ва ўрачыстай цырымоніі прыняла ўдзел першы сакратар Карэліцкага раённага камітэта грамадскага аб’яднання “Беларускі рэспубліканскі саюз моладзі” Таццяна Шэўчык. У сваім звароце да моладзі яна адзначыла, што маладыя людзі – гэта рухаючая сіла дзяржавы, і іх удзел у грамадскім жыцці краіны адыгрывае ключавую ролю ў фарміраванні нацыянальнай будучыні.
— Канстытуцыя Рэспублікі Беларусь — гэта аснова нашай дзяржавы, адлюстраванне гістарычнага выбару беларускага народа, зробленага на карысць суверэнітэту, сапраўднай дэмакратыі і духоўна-маральных каштоўнасцяў. Маладое пакаленне — гэта тая сіла, якая павінна не толькі захоўваць пераемнасць традыцый, але і фарміраваць будучыню нашай краіны,
Першы сакратар уручыла 39 юнакам і дзяўчатам білеты і значкі БРСМ.
Атмасфера падчас урачыстасці панавала святочная. На працягу ўсяго мерапрыемства гучалі патрыятычныя песні ў выкананні артыстаў раёна.
Трымаючы ў руках свой доўгачаканы і такі важны дакумент, юныя жыхары рэгіёна адчувалі аднолькавыя эмоцыі — лёгкае хваляванне, гонар, і, вядома, адказнасць за будучыню сваёй роднай дзяржавы. Рабяты падзяліліся, што для іх гэта сапраўды адна з самых важных у жыцці падзей, успаміны пра якую яшчэ доўга будуць грэць сэрца.
– Усё гэта хвалююча. Атрыманне пашпарта ўспрымаецца як першы крок у дарослае жыццё. Гэта дакумент, які не проста сведчыць асобу чалавека, а дакумент, які ўскладае на плечы пэўныя абавязкі, адказнасць за будучыню краіны, за мірнае неба, – сказала вучаніца сярэдняй школы № 1 Вера Вадап’ян.– Я адчуваю радасць і ў той жа час гонар за сябе, за сваіх аднакласнікаў, і, вядома, за сваю Радзіму.
Свой першы пашпарт атрымаў сёння Дзмітрый Шнырко. Юнак распавёў, што ў будучым марыць стаць урачом, а таму імкнецца добра вучыцца, пры гэтым актыўна ўдзельнічае ў грамадскім жыцці школы. Ён ўпэўнены, што ўпартая праца і падтрымка дзяржавы дазволяць паступіць у выбраную ВНУ і стаць высакакласным спецыялістам.
– Хочацца стаць годным грамадзянінам сваёй краіны і ўдзельнічаць у яе развіцці. Я вельмі рады і ўражаны сённяшняй урачыстасцю, удзячны за магчымасць быць тут. Упэўнены, што гэта стане чарговай падставай для гонару і для маіх бацькоў, – адзначыў Дзмітрый.
Лаўровіч Яўгенія, навучэнка сярэдняй школы №1, сказала, што вельмі хвалявалася напярэдадні такога важнага мерапрыемства. Разам з тым, яна вельмі рада, што напярэдадні святкавання Дня Канстытуцыі стала членам БРСМ і атрымала членскі білет з рук маладзёжнага лідара раёна.
– Гэта вялікі гонар для мяне. Запомню гэтую падзею назаўжды, — запэўніла дзяўчына.
Разам з высокімі паказчыкамі ў вучобе, Яўгенія дэманструе годныя вынікі ў спорце. Яна з’яўляецца прызёрам і пераможцам многіх спаборніцтваў. Сённяшняе мерапрыемства стала для яе дадатковым стымулам у дасягненні новых вышынь.
Кацярына КУКАНАВА
Фота Сяргея СТОЛЯРА
