У Мірскім сельвыканкаме прайшло пасяджэнне рабочай групы, на якім разгледзелі абставіны пажару з гібеллю двух чалавек у г.п. Мір.
У зале сабраліся члены рабочай групы па каардынацыі дзейнасці назіральных камісій і прадстаўнікі ўсіх зацікаўленых службаў.
Смерць чалавека гэта заўсёды гора, а гібель у выніку няшчаснага выпадку – трагедыя. На старонках газеты ўжо шмат разоў пісалі пра пажары, якія ўзнікаюць па прычыне курэння ў стане алкагольнага ап’янення, аб неабходнасці ўстаноўкі аўтаномных пажарных апавяшчальнікаў у дамах і кватэрах, публікавалі матэрыялы з правіламі спальвання смецця на прысядзібных участках, а людзі ўсё роўна грэбуюць асновамі бяспечных паводзін.
Адкрываючы нараду, намеснік старшыні Карэліцкага райвыканкама, старшыня рабочай групы Яўген Чычкан падкрэсліў, што прафілактычная работа па стварэнні бяспечных умоў жыццядзейнасці грамадзян вельмі актуальная.
– У раёне абстаноўка з пажарамі і гібеллю на іх людзей выклікае непакой, яна абвастрылася. У бягучым годзе назіраецца рост пажараў: 20 супраць 15 у мінулым годзе, ахвярамі агню сталі 5 чалавек (у 2024 — 4). Асноўнай прычынай вогненных надзвычайных здарэнняў стала неасцярожнае абыходжанне з агнём. Так, сёлета, у пачатку чэрвеня, пажар у г.п. Мір забраў жыцці двух людзей. Мяркуемая прычына неасцярожнае абыходжанне з агнём пры курэнні. Паднятае пытанне сур’ёзнае. Праблему неабходна вырашаць у цесным узаемадзеянні ўсіх суб’ектаў прафілактыкі, – сказаў Яўген Мікалаевіч, адзначыўшы, што трымаць руку на пульсе і актыўна ўключацца ў прафілактычную работу павінны усе зацікаўленыя службы, грамадскасць. Праца суб’ектаў прафілактыкі вельмі важны складнік у справе прафілактыкі. Відавочна, што яна патрабуе трансфармацыі. Наша задача аптымізаваць яе, зрабіць больш якаснай.
На пасяджэнні аб папярэдне праведзенай прафілактычнай рабоце з жыхарамі г.п. Мір, якія сталі ахвярамі агню, расказаў дырэктар ДП “Птушкафабрыка “Чырвонаармейская” Канстанцін Вязнюк, выступілі прадстаўнікі іншых зацікаўленых служб. Кожны падрабязна спыніўся на тых мерапрыемствах, якія былі праведзены, каб пазбегнуць вогненнай трагедыі.
Прысутнымі было выказана шмат ініцыятыў па паляпшэнні ўзаемадзеяння паміж суб’ектамі прафілактыкі.
Падводзячы вынікі працы, старшыня рабочай групы нацэліў прадстаўнікоў суб’ектаў прафілактыкі ўзмацніць працу ў дачыненні да катэгарыраваных грамадзян, у прыватнасці да адзінокіх, а таксама пажылых людзей, якія пражываюць са злоўжываючымі алкаголем сваякамі.
Як неаднаразова падкрэслівалася падчас пасяджэння, любыя меры, якія дазваляюць знізіць рызыку гібелі людзей у выніку пажараў, важныя. Галоўнае суб’ектам прафілактыкі падчас абследаванняў домаўладанняў і вяскоўцаў, і гараджан не выпускаць з-пад увагі нават дробныя дэталі, здольныя стварыць пагрозу ўзнікнення пажару. Не проста іх фіксаваць, а праяўляць прынцыповую пазіцыю па ліквідацыі.
Кацярына КУКАНАВА
Фота аўтара
