СКАЗАНА
Прэзідэнт Беларусі Аляксандр ЛУКАШЭНКА:
— Мы зберажом і прымножым матэрыяльную і духоўную спадчыну пакаленняў, перададзім нашчадкам суверэнную і незалежную дзяржаву, наш агульны дом, дзе яны заўсёды будуць адчуваць сябе ў бяспецы і камфорце. Гэта і ёсць наш шлях! І праўда (а ў ёй сіла) — на нашым баку!
З Паслання Прэзідэнта Беларусі Аляксандра Лукашэнкі беларускаму народу і Нацыянальнаму сходу, 28 студзеня 2022 года.
Загадчык сектара нестацыянарнага абслугоўвання ДУ «Карэліцкі раённы Цэнтр культуры і народнай творчасці», кіраўнік калектыву Юлія Шахрай расказвае, што на шляху да высокай адзнакі было прыкладзена нямала старанняў.
Калектыў створаны ў 1967 годзе. Працаваў тады пры Тудараўскім сельскім клубе. У 2013 годзе перайменаваны ў фальклорны танцавальны калектыў і дзейнічаў на базе Карэліцкага РЦКіНТ. Яго кіраўніком быў Васілій Чартко, з 2021 і па жнівень 2023 года — Вольга Ложачнік. З верасня калектыў узначаліла Юлія Шахрай.
У 2024 годзе «Спадчына» прыняла ўдзел у рэспубліканскім конкурсе «Берагіня». Стала дыпламантам ІІ ступені ў намінацыі «Лепшы фальклорны танцавальны калектыў» (г. Гродна).
Наведалі свята кадрыляў «Па сцежках спадчыны» ў аграгарадку Азёркі Мастоўскага раёна.
Як адзначае кіраўнік калектыву, плённым аказаўся і 2025 год. Фальклорны танцавальны калектыў «Спадчына» ўдзельнічаў у абласным фестывалі-конкурсе побытавых танцаў «Танцуем па-даўнейшаму» і атрымаў адразу тры перамогі: Таццяна і Кірыл Дубковы — дыпламанты першай ступені, Таццяна Шэўчык і Кірыл Шпарло — другой, Юлія Шахрай і Аляксандр Чарапанаў — трэцяй.
У абласным конкурсе танцавальных калектываў «Скокі ва ўсе бокі» атрымалі Дыплом ІІ ступені ў намінацыі «Народны танец».
Летась сталі ўдзельнікамі ХХХІV Міжнароднага фестывалю мастацтваў «Славянскі базар у Віцебску» і былі ўзнагароджаны двума Дыпломамі.
Юлія Шахрай нагадала аб накірунку дзейнасці калектыву: выконваюць танцы нашай мясцовасці. Гэта «Тудараўская кадрыля», «Лядкаўская кадрыля», «Загорская кадрыля». Спадчынцы імкнуцца захаваць традыцыі бацькоў і перадаць маладому пакаленню традыцыі народнай культуры. З цягам часу, на жаль, носьбітаў традыцыйнай народнай культуры становіцца ўсё менш. А гэта наша нематэрыяльная спадчына, якая дзесяцігоддзямі перадавалася з пакалення ў пакаленне.
У апошні час фальклорны танцавальны калектыў абнавіўся. У яго склад увайшлі служачыя, рамеснікі, дамашнія гаспадыні, нават сямейныя пары. Розныя па характары і ўзросце, яны аб’яднаны адным жаданнем — праз фальклорныя танцы несці культуру ў масы, і каб радасць адгукалася ў сэрцах гледачоў.
Жыхар вёскі Горная Рута Красненскага сельсавета Анатолій Антонаў, які танцуе ў «Спадчыне» ўжо два гады, адзначае:
— На рэпетыцыі ходзім з жонкай Святланай. Падказала пра фальклорны танцавальны калектыў яго ўдзельніца Таццяна Дубкова. Мы зацікавіліся — і прынялі рашэнне: наведваць рэпетыцыі і ездзіць на выступленні.
Зараз я вельмі рады, што ў маім жыцці з’явіўся такі творчы накірунак. «Спадчына», па-першае, — гэта аддушына для душы і яшчэ адзін бонус у жыцці. Займаючыся паўсядзённымі справамі, можна раскрыцца творча. Радуе і тое, што дорым радасць людзям.
Я працую зваршчыкам у Карэліцкім гаргазе, работа механічная, а я чалавек творчы. Асабіста для мяне «Спадчына» — новыя знаёмствы і творчае натхненне, якія, спадзяюся, будуць працягвацца.
Вядучы аграном Карэліцкай раённай інспекцыі па насенняводстве, каранціне і абароне раслін, інструктар Фізкультурна-спартыўнага клуба Кацярына Кошур расказвае:
— У «Спадчыне» я амаль два гады, і мне тут вельмі падабаецца. Сюды прыйшла, каб паказаць сваім дзецям тое, што чалавек можа развівацца ўсебакова. Акрамя сваёй прафесійнай дзейнасці, можна знайсці сябе і ў культуры, і ў спорце. Фальклорныя танцы выбрала таму, што адчуваю сябе часцінкай беларускага народа і сваіх продкаў. Даўней жыццё было больш цяжкім, людзі шмат працавалі, мелі вялікія сем’і, абаранялі сваю зямлю, але ніколі не жадалі злосці, з павагай і любоўю адносіліся адзін да аднаго — і ўсё гэта адлюстравана ў народных танцах. Гэта частка нашай беларускай культуры. Гэтым мы паказваем, што мы — беларусы. Мы былі, ёсць і будзем.
Галіна СМАЛЯНКА
Фота Іны ЛЕЙКІ, Кацярыны ЖАМОЙДЫ, Андрэя ДЗЯНІСКА
