Жыццё на пенсіі ў кожнага сваё. У большасці людзі залатога ўзросту знаходзяць сабе любімы занятак па душы. У некаторых іх бывае некалькі, і гэта ўзнімае настрой і выклікае станоўчыя эмоцыі. Валянціна Фёдараўна Хіневіч з г.п. Карэлічы — чалавек, у якога ў сутках больш за 24 гадзіны.
— Валянціна Фёдараўна, як успрынялі выхад на пенсію?
— Спакойна і рацыянальна, я б сказала па-філасофску: чакала гэтага перыяду і калі падышлі гады, успрыняла з разуменнем. Да гэтага часу збудаваліся планы на асабістае жыццё.
— З чаго пачалі жыццё на заслужаным адпачынку?
— На першым часе дапамагала гадаваць унукаў — з выхадам на пенсію з’явілася такая магчымасць. Далей жа спланавала вандраванні з жаданнем пазнаць наваколле.
— Як прыйшлі ў Цэнтр сацыяльнага абслугоўвання насельніцтва Карэліцкага раёна?
— Пра Цэнтр мне расказвала Вера Віктараўна Сцецка. Так я стала частым яго наведвальнікам, і гэтым задаволена: цяпер у мяне з’явілася шмат цікавых спраў.
— Ваша кола заняткаў разнастайнае?
— Я займаюся актыўным спортам, наведваю гурток танцаў, з’яўляюся валанцёрам і ўдзельнічаю ва ўсіх акцыях па аказанні сацыяльна-бытавой дапамогі адзінокім пажылым і інвалідам. Стараюся не прапусціць велапрабегаў і суботнікаў, якія праводзіць ЦСАН Карэліцкага раёна. Дзякуючы таму, што наведваю Цэнтр, мой дзень цяпер праходзіць цікава і напоўнены станоўчымі эмоцыямі.
— Што яшчэ, акрамя заняткаў па інтарэсах, тут знайшлі?
— Даводзілася бываць на розных мерапрыемствах і сустрэчах. Напрыклад, былі на пазнавальнай гульні «Інтэлектуалы сярэбранага ўзросту» ў г.п. Воранава і занялі другое месца. У г.п. Жамчужны Баранавіцкага раёна Брэсцкай вобласці наш танцавальны калектыў «Задорынка» быў узнагароджаны Дыпломам II ступені ў міжрэгіянальным фестывалі творчасці для пажылых грамадзян.
Дарэчы, для наведвальнікаў Цэнтра арганізоўваюцца пазнавальныя і цікавыя экскурсіі. Сярод іх — у музейны комплекс «Дудуткі», на фермерскую гаспадарку па вырошчванні слімакоў у вёску Даўгінава Ярэміцкага сельсавета і іншыя месцы.
— У залатым узросце важныя зносіны з іншымі людзьмі. У Вас шмат сяброў?
— Дзякуючы такому рытму жыцця на пенсіі ў мяне з’явілася вялікая колькасць сяброў, чаму я вельмі рада. Многіх з іх сустрэла дзякуючы наведванню нашага Цэнтра.
— Адкуль Вы чэрпаеце інфармацыю — з інтэрнэт-крыніц, газет, тэле- і радыёперадач?
— Так, з інтэрнэт-рэсурсаў і ад зносін з наведвальнікамі Цэнтра. У Інтэрнэце цікаўлюся навінамі і падзеямі нашага раёна і ўсёй Беларусі. У ЦСАН Карэліцкага раёна абяркоўваем рэцэпты прыгатавання страў і сакрэты вырошчвання дамашняй агародніны і садавіны.
— Што Вы можаце параіць тым, хто хвалюецца, як будзе праводзіць час на заслужаным адпачынку?
— Не трэба баяцца выхаду на пенсію. Можна знайсці шмат цікавых спраў у жыцці і ўдзяліць увагу тым захапленням, пра якія марылі яшчэ ў юнацтве і не паспелі іх ажыццявіць. На пенсіі для гэтага ёсць магчымасць.
— Вы задаволены тым, чым займаецеся? Магчыма, яшчэ ёсць задумкі?
— Я жыццявіла многія свае мары: навучылася танцаваць, палюбіла веласпорт, авалодала сакрэтамі вязання, асвоіла камп’ютарную грамату. Як валанцёр маю магчымасць дапамагаць іншым людзям, якім трэба падтрымка. Наведала шмат цікавых мясцін. У марах — пасадзіць каля свайго дома бэзавы сад. Дарэчы, ужо высадзіла першыя саджанцы.
— Валянціна Фёдараўна, якое вызначэнне Вы далі б пенсійнаму ўзросту?
— Для мяне пенсійны ўзрост — час вялікіх магчымасцей і цікавага жыцця.
Галіна СМАЛЯНКА
Фота Кацярыны ЖАМОЙДЫ
