Карэліччыну наведалі рэйдавыя групы з ліку тэхнічных інспектараў працы Федэрацыі прафсаюзаў Беларусі. Іх мэта — прафілактыка вытворчага траўматызму, узаемадзеянне з наймальнікамі ў стварэнні здаровых і бяспечных умоў працы, павышэнні эфектыўнасці грамадскага кантролю за захаваннем заканадаўства аб ахове працы. Яны наведалі сельгаспрадпрыемствы, установы аховы здароўя і адукацыі, будаўнічыя аб’екты раёна.
Вынікі маніторынгу рэйдавых груп падвялі на семінары-нарадзе, які адбыўся ў Карэліцкім маладзёжным цэнтры культуры. Яго ўдзельнікамі сталі кіраўнікі і спецыялісты арганізацый, старшыні прафкамаў. Сярод пытанняў, якія абмеркаваны на сустрэчы, вялікая ўвага была нададзена прафілактыцы вытворчага траўматызму.
У семінары-нарадзе прыняў удзел начальнік Гродзенскага абласнога ўпраўлення Дэпартаменту дзяржаўнай інспекцыі працы Міністэрства працы і сацыяльнай абароны Рэспублікі Беларусь Віктар Мацкевіч, які падрабязна расказаў аб стане вытворчага траўматызму ў арганізацыях вобласці і неабходных мерах па яго прафілактыцы. Яго інфармацыя падмацоўвалася кадрамі з відэафільмаў, якія выклікалі вялікае ўражанне ў прысутных. «Наша задача — навучыць людзей папярэдзіць няшчасныя выпадкі. Іншы раз на гэта не патрэбны вялікія грошы, а неабходна выконваць правілы. Тэхніка бяспекі памылак не даруе», — падкрэсліў прамоўца.
Галоўны тэхнічны інспектар працы Гродзенскага абласнога аб’яднання прафсаюзаў, кіраўнік групы Дзмітрый Гаравенка і члены рэйдавых груп вялі адкрытую размову аб выкананні заканадаўства аб ахове працы. Падкрэслівалася, што асноўная задача — прафілактычная, а кіраўнікі арганізацый павінны арганізаваць бяспечныя ўмовы працы. У калектыве павінен існаваць добры маральна-псіхалагічны клімат, іншы раз падказка калегі мае немалаважнае значэнне і можа садзейнічаць бяспечнай працы. Былі закрануты і пытанні аб ролі грамадскіх інспектараў у арганізацыях, узаемадзеянні паміж службамі па ахове працы, звернута ўвага на паўторныя інструктажы з работнікамі, санітарна-бытавыя ўмовы працуючых і іншыя пытанні.
Пэўная ўвага была адведзена будаўнічай галіне. Прагучала пажаданне звяртаць увагу на небяспечныя зоны і на працу ў дрэнных умовах надвор’я. Неабходна забяспечваць работнікаў сродкамі сацыяльнай абароны і арганізоўваць пітны рэжым. Праяўляць пільнасць і асцярожнасць пры працы на вышыні.
Прамоўцы пажадалі безаварыйнай работы і недапушчэння няшчасных выпадкаў на вытворчасці. «Усё аглядзець перад тым, як зрабіць крок» — асноўнае правіла, якога трэба прытрымлівацца.
Інфармацыя аб выніках праведзенага маніторынгу будзе даведзена да ведама арганізацый раёна. Да ўхілення заўваг і пажаданняў члены рэйдавых груп раілі прыступіць неадкладна, бо за імі — жыццё чалавека, якое трэба берагчы. І тут няма месца абыякавасці.
Галіна СМАЛЯНКА
Фота Святланы МАЛАХВЕЙ
