Мірскі сельсавет
Медык з чулым сэрцам
Загадчыца Аюцавіцкага фельчарска-акушэрскага пункта Ганна Уладзіміраўна Манюк — нераўнадушны чалавек. Яна прыйдзе на дапамогу кожнаму хвораму па першым выкліку. Спяшаецца ў першую чаргу да пажылых і інвалідаў, у сем’і з непаўналетнімі дзецьмі. Не застаюцца па-за ўвагай і астатнія вяскоўцы. Медыцынскі работнік працуе ў цеснай сувязі з работнікамі Мірскага сельсавета.
Візіт дабрыні ў бальніцу
У рамках акцыі «Ад усёй душы» Мірская бібліятэка і члены валанцёрскага атрада «Стрыж» Мірскага дзяржаўнага каледжа наведалі аддзяленне сацыяльнага абслугоўвання Мірскай гарпасялковай бальніцы. Яны падарылі пацыентам кнігі і салодкія пачастункі. Госці выказалі людзям залатога ўзросту словы падзякі за добрасумленную працу, жыццёвыя мудрасць і вопыт.
Працоўны дэсант у Міры
Праведзена высечка дравесна-хмызняковай расліннасці на землях агульнага карыстання па вуліцы Радуньскай у г.п. Мір сіламі Мірскага сельсавета, раённага аддзела па надзвычайных сітуацыях і Мірскага дзяржаўнага каледжа.
Другое жыццё калодзежа
На землях агульнага карыстання ў вёсцы Беражна, па вуліцы Школьнай, недалёка ад магазіна райспажыўтаварыства, рэканструяваны грамадскі калодзеж. Добрую справу зрабілі работнікі Мірскага сельсавета і нераўнадушныя жыхары.
Ярэміцкі сельсавет
«Ярэміцкія маскі» працягваюць здзіўляць
Пры Ярэміцкім Доме культуры прадаўжае дзейнічаць «народны» тэатр гульні «Ярэміцкія маскі» (кіраўнік Валянціна Падалянчык).
Па-ранейшаму ярэміцкія маскі радуюць жыхароў Ярэміч і гасцей аграгарадка. Толькі ў навагоднія святы выступленні тэатра паглядзелі больш за 100 чалавек. На прадстаўленне прыехалі гледачы з многіх населеных пунктаў раёна. «Ярэміцкія маскі» будуць і далей радаваць сваіх гледачоў новымі пастаноўкамі.
Рэтра-выстава са шкла
У Ярэміцкай базавай школе імя У. А. Калесніка арганізавана рэтра-выстава навагодніх цацак. Тут можна ўбачыць шкляную гародніну і садавіну, казачных герояў, бытавую тэхніку і многае іншае. Усе гэтыя цацкі мінулага стагоддзя на яловых лапках радавалі вока. Акрамя гэтага, на выставе можна палюбавацца і навагоднімі паштоўкамі, якімі віншавалі сваіх родных нашы бабулі і мамы.
На пенсіі жыццё толькі пачынаецца
Ірына Мікалаеўна і Аляксандр Аляксандравіч Паплаўскія з аграгарадка Ярэмічы на заслужаным адпачынку не любяць траціць марна час. Кожны з іх імкнецца знайсці сабе справу па душы. Жанчына працуе сацыяльным работнікам, абслугоўвае састарэлых у Ярэмічах і Сіняўскай Слабадзе, і сваю справу любіць. А яшчэ моцна любіць зямлю, да якой разам з мужам імкнуцца прыкласці рукі. У агародчыку растуць маліна, клубніцы, буякі, агародніна і шмат кветак.
Яны любяць ездзіць у лес па грыбы і ягады, хапае дароў прыроды і сабе, і людзям. Ёсць у сям’і Паплаўскіх і свае захапленні: гаспадар пляце кошыкі і вяжа венікі, а гаспадыня любіць рыбалку. Вось такія яны, няўрымслівыя па характары, бо не заглядаюць у пашпарт. Мараць аб тым, каб быў мір на зямлі. «Жыццё на пенсіі цудоўнае, толькі не трэба траціць яго дарэмна», — перакананы ярэміччане.
Малюшыцкі сельсавет
Захапленні Марыі Ждан
Вышыўка – гэта не толькі прыемнае баўленне часу, але і тонкая ручная работа, у якую майстар укладвае сваю душу. Вось ужо шмат гадоў па-майстэрску вышытыя вырабы Марыі Антонаўны Ждан з вёскі Волца прыцягваюць погляд вяскоўцаў, родных і знаёмых майстэрскім спалучэннем рознакаляровых нітак.
Зараз Марыі Антонаўне 76 гадоў, а вышыўкай яна пачала займацца, калі была шасцігадовай дзяўчынкай. Спачатку назірала за стараннымі рукамі маці, якія з любоўю пакідалі на ручніках і сурвэтках прыгожыя кветкі. А потым, узяўшы ў рукі іголку, пачала вышываць сама. І з тых часоў з гэтым займальным заняткам не растаецца. Зараз вельмі часта ўзоры, вышытыя на вырабах, – гэта імправізацыя. Жанчына нават можа не карыстацца схемамі, проста выношвае задумку, а потым натхнёна пераносіць яе на тканіну.
– Маё хобі па-сапраўднаму стала любімай справай, – расказвае Марыя Антонаўна, – людзям падабаюцца такія рэчы. Вышыўка запатрабаваная, яна прыгожа глядзіцца на сучаснай вопратцы і ў інтэр’еры. Калісьці вышыванкамі быў упрыгожаны алтар Малюшыцкай царквы, ёсць мае работы і ў Канадзе, і ў Германіі. Такія работы любяць за стыль і ўнікальнасць, бо кожны створаны ўзор мае сваё сакральнае значэнне. Нават калі пусціць у ход фантазію і змяніць нешта на свой густ, усё роўна зробіш гэта так, каб узор быў цэласным, усе дэталі дапаўнялі і падкрэслівалі адна другую, – упэўнена майстар.
З кожным годам калекцыя вышытых вырабаў папаўняецца. Акрамя вышывання, жанчына ўжо больш чатырох гадоў назад асвоіла тэхніку пляцення вырабаў з папяровай лазы.
Перамагаючы слабасці
На мехмайстэрнях агр. Малюшычы ДП “Малюшычы” адбылося пасяджэнне камісіі па садзейнічанні сям’і і школе, барацьбе з п’янствам і алкагалізмам. Падчас яе работы разгледзелі пытанні выканання патрабаванняў Дырэктывы № 1 “Аб мерах па ўмацаванні грамадскай бяспекі і дысцыпліны“, а таксама пытанне прафілактыкі пажараў і папярэджанне надзвычайных сітуацый у жылым сектары.
Па выніках работы камісіі выпрацаваны шляхі і метады працы па дадзеных пытаннях.
Служба информации «Полымя»
