У краме «Ярэмічанка» дзверы не зачыняюцца ні ў будні, ні ў святы. Бо галоўным дэвізам гэтай невялікай гандлёвай кропкі, размешчанай у аграгарадку Ярэмічы, з’яўляецца свежасць прадукцыі і ветлівасць у абслугоўванні.
На прылаўках ёсць усё, што звычайна прапануе любая добрая крама. У мясным аддзеле налічыла больш за дзясятак гатункаў каўбас розных найменняў, а яшчэ субпрадукты, салёнае сала, грудзінка. У асартыменце малочная прадукцыя, гародніна і садавіна, дзіцячае харчаванне і прысмакі. Тавар запатрабаваны, адпавядае запытам правільнай выкладкі і дэманструе клопат пра густы і жаданні спажыўца.
70-гадовая Марыя Уладзіміраўна Вашэсцік з Ярэміч кажа: «У гэтую краму хаджу амаль кожны дзень. Прыцягвае вялікі выбар тавараў і ўважлівае абслугоўванне. Усё свежае, і нашы людзі задаволеныя».
Маладая мама Ірына Васілеўская з Быковіч з двума сынамі прыехала ў «Ярэмічанку» па дзіцячае харчаванне і прадукты маме, якая жыве ў в. Вобрына. «Любімая крама», — так характарызуе гандлёвую кропку Ірына.
У гутарцы з мясцовымі жыхарамі, якія зайшлі за пакупкамі, даведваюся, што гэты магазін палюбіўся і жыхарам навакольных вёсак Скорычы, Зарэчча і іншых. Нягледзячы на тое, што ў гэтыя вёскі спраўна ходзіць аўтамагазін, вяскоўцы ўсё роўна спяшаюцца ў «Ярэмічанку». І нават дачнікі, жыхары Мінска і іншых буйных гарадоў не вязуць прадукты з горада, а з задавальненнем заходзяць у сельскую краму.
У 2004 годзе Іна Барычэўская, якая з’яўляецца дырэктарам ПГУП «Ярэмічанка», вырашыла адкрыць краму.
— Я разумела, што людзей можна зацікавіць толькі якасцю і свежасцю прадуктаў. Амаль кожны дзень завозіцца свежая каўбаса, тры-чатыры разы на тыдзень — малочная прадукцыя. Мы працуем толькі з вядомымі і добра зарэкамендаваўшымі сябе вытворцамі са Слоніма, Дзяржынска, Баранавіч, Ваўкавыска, Ліды і Навагрудка.
Больш за 10 гадоў у «Ярэмічанцы» працуе прадавец Юлія Батура. Ветлівая і прыязная, яна заўсёды добрасумленна выконвае свае абавязкі, за што яе любяць і калегі, і пакупнікі. А апошнія бываюць розныя, і таму прадаўцам трэба быць удвая цярплівымі, ветлівымі і абыходлівымі. Кагосьці цікавіць склад каўбасы, кагосьці — дата яе вырабу, а хтосьці проста просіць параіць, што лепш узяць.
— Стараемся дапамагчы ўсім. І пакупнікі нам за гэта ўдзячныя. Дзякуй ім за давер, мы заўсёды рады іх у нас бачыць, — кажа Юлія Батура.
Клапоцяцца ў краме і пра экалогію. Як не без гонару гаворыць Іна Барычэўская, за ўвесь час працы крамы ніводнай паперкі не выкінулі. «Макулатуру збіраем у абавязковым парадку, а потым здаём мясцоваму камунгасу на перапрацоўку. Дзіўна, што некаторыя людзі так абыякава ставяцца да навакольнага асяроддзя, выкідваюць тое, што яшчэ магло б паслужыць ім самім», — разважае дырэктар крамы.
Спускаюся па прыступках «Ярэмічанкі» ў прыўзнятым настроі і думаю пра тое, як добра, што ў сельскую мясцовасць даўно прыйшлі і прыжыліся такія крамы, дзе можна ў любы час не толькі свежага хлеба ды малака купіць, але і выбраць усё для святочнага стала.
Іна ЛЕЙКА
Фота аўтара
